Абу Али ибн Сино номидаги Бухоро давлат тиббиёт институтига жаҳон миқёсида тан олинган олим, Нобель мукофоти соҳиби профессор, доктор Рик Лиманс (Rik Leemans) ташриф буюрди.

Профессор Рик Лиманс – Нидерландиянинг Вагенинген (Wageningen) университети ва тадқиқот марказида фаолият юритувчи, атроф-муҳит тизимларини таҳлил қилиш бўйича етакчи мутахассис ҳисобланади. У бутун дунё бўйлаб экологик барқарорлик ва иқлим ўзгариши йўналишида йирик илмий лойиҳаларни амалга ошириб, ривожланаётган давлатларнинг ёш олимларини тадқиқот ишларига фаол жалб этиб келади.

У Иқлим ўзгариши бўйича ҳукуматлараро экспертлар гуруҳи (IPCC – Intergovernmental Panel on Climate Change) муаллифларидан бири бўлиб, ушбу гуруҳ 2007 йилда Тинчлик учун Нобель мукофотига сазовор бўлган. Профессор Лиманснинг илмий фаолияти иқлим ўзгаришини ўрганиш, экотизимларни муҳофаза қилиш ва инсон фаолиятининг табиатга таъсирини баҳолаш йўналишларида юқори эътирофга сазовор бўлган.

Ташриф доирасида профессор Рик Лимансга Tsindao университети профессори Баогал ҳамроҳлик қилди. Меҳмонларни институт ректори профессор Шуҳрат Тешаев ва бошқалар кутиб олди. Делегация аъзолари институтнинг замонавий лаборатория ва илмий-инновацион объектларини кўздан кечирди.

Профессор Рик Лиманс томонидан институт талабалари ва тадқиқотчиларига иқлим ўзгариши ҳамда экологик барқарор ривожланиш мавзусида маърузалар ўқилиши режалаштирилган.

Зариф Комилов, ЎзА мухбири.