Хитой ва Ҳинд импортёрлари Россиядан нефть сотиб олиш ҳажмини оширмоқда, бу билан улар Россияга қарши қўлланилаётган санкциялар самарасини пасайтирмоқда. Японияда чиқадиган Nikkei газетаси яқинда шу ҳақда материал берди.

Хабарда айтилишича,  ХХР май ойида Россиядан денгиз йўли орқали ҳар куни 800 минг баррел нефть  сотиб олган, бу январдаги кўрсаткич билан солиштирганда 40 фоизга кўпдир. Ҳиндистоннинг ҳам май ойида харид қилган қора олтин миқдори кунига 700 минг баррелни ташкил этган.

Nikkei газетасининг ёзишича, АҚШ ва Европа Хитой билан Ҳиндистонни Россиянинг арзон ресурсларини харид қилишдан тийилиб туришга чақиради, чунки "энергомаҳсулотларнинг глобал нархи ошиб бораётган бир пайтда ушбу харидлар иқтисодий нуқтаи-назардан уларга сезиларли устунлик беради".