Нигерияның Риверс штатына қарасты Омоку аймағында заңсыз өндірілген мұнай сақталған үйде жарылыс болды.

«Анадолу» ақпарат агенттігінің хабарлауынша, оқиға салдарынан бес адам тірідей жанып кеткен, бірнеше адам жарақат алған.

Африка құрлығындағы мұнай мен газ қорына бай Нигерия үкіметі қара алтынды ұрлауға қатысты мәселелерге жиі тап болады. Бұл қылмыстар ел экономикасының дамуына айтарлықтай кері әсерін тигізуде.

Мысалы, 2023 жылы мұнай ұрлығы мен құбырларға жасалған шабуылдар салдарынан Нигерия 3 миллиард доллардан астам шығынға ұшырағаны хабарланған.