Ғарбий Африка давлатлари иқтисодий ҳамжамияти (ЭКОВАС) аъзо мамлакатлар мудофаа штаблари бошлиқлари қўмитасига зудлик билан захирадаги кучларни фаоллаштиришга кўрсатма бермоқда, деган жамоавий  комиссия раҳбари Омар Али Туре.

“Бош штаб бошлиқлари қўмитасига захирадаги кучларнинг барча бўлинмаларини тайёр ҳолга келтириш топшириғи берилди”, деди у.Комиссия раҳбари, шунингдек, жамият Нигерда конституциявий тузумни тиклаш учун тайёр кучларни юборишга буйруқ бераётганини қўшимча қилган.

Ғарбий Африка давлатлари иқтисодий ҳамжамияти Нигерга ҳарбий аралашувни эртароқ бошлаш таклифини қўллаб-қувватлайди, деган Кот-д'ИвуарПрезиденти Алассан Уаттара.

“Штаб бошлиқлари масалаларни ҳал қилиш учун яна бир нечта конференция ўтказади, бироқ операцияни имкон қадар тезроқ бошлаш учун давлат раҳбарлари розилиги олинган”, – дея Кот-д' Ивуар раҳбарининг сўзларидан иқтибос келтирган Франcе-Прессе агентлиги.

Уаттаранинг сўзларига кўра, Кот-д'Ивуар 1 минг 100 кишигача бўлган батальонни таъминлайди. Халқаро контенгентга Нигерия ва Бенин аскарларидан ташқари бошқа давлатлар ҳам аскар беради. “Биз Нигер президентини ўз вазифаларига қайтаришга қатъий қарор қилдик”, дея қўшимча қилган у. ЭКОВАС қарорини Қўшма Штатлар ва Франция ҳам қўллаб-қувватламоқда.

АҚШ Давлат котиби Энтони Блинкеннинг сўзларига кўра, "ЭКОВАС Нигерда конституциявий тузумни қайтариш императивини аниқ кўрсатишда етакчилик қилмоқда. Биз уларнинг ишини ва раҳбарлигини қўллаб-қувватлаймиз", деган  Блинкен журналистлар билан учрашувда.

Франция ҳам Ғарбий Африка давлатлари Иқтисодий ҳамжамиятининг Нигерда конституциявий тузумни куч билан тиклашга доир қарорларини қўллаб-қувватлайди, деди Франция Ташқи ишлар вазирлиги.

“Франция ЭКОВАС саммити қарорларини тўлиқ қўллаб-қувватлайди”, – дейилади ТИВ тарқатган баёнотда.

ТИВ баёнотида қайд этилишича, саммит иштирокчилари Нигерда конституциявий ва демократик тартибни тиклаш, Президент Муҳаммад Базум ва унинг оиласи зудлик билан озод этилишини таъминлаш бўйича қатъийлигини яна бир бор тасдиқлаган.

Бироқ масаланинг яна бир мураккаб томони исёнчиларнинг тинчлик музокараларига рози бўлмаётганида бўлмоқда. Куни кеча АҚШ давлат департаменти раҳбари ўринбосари Виктория Нуланд ҳам вазиятни юмшатишга ҳаракат қилган эди. Бироқ унинг миссияси ҳам натижасиз якунланган. Нуланд исёнчилар раҳномаси билан ҳам, Президент Базум билан ҳам учраша олмаган. Қолаверса, давлат тўнтаришини амалга оширган  ҳарбийлар агар ЭКОВАС мамлакатга қўшин киритса, Президент Муҳаммад Базумни ўлдириши ҳақида баёнот берган.

“Нигер Хунтаси АҚШнинг юқори мартабали дипломатига агар қўшни давлатлар ҳокимиятни тиклаш учун ҳарбий аралашувга ҳаракат қилса, ҳокимиятдан ағдарилган Президент Муҳаммад Базумга суиқасд қилишларини айтган”, дейилади хабарда.

Нуланд Базумга таҳдид борлигини шу ҳафта Нигерга қилган ташрифи чоғида билди, дейди агентлик.

Исёнчиларнинг музокараларга рози бўлмаётгани ЭКОВАС га аъзо давлатлар учун вазиятни ҳарбий йўл билан ҳал этиш вариантига тўхталишдан боша чора қолдирмаяпти. Қолаверса, ҳарбий чорани АҚШ ва Франция ҳам қўллаб-қувватламоқда. Масалан, куни кеча матбуотда Франция ҳарбийлари Нигер миллий гвардияси объектларига зарба бергани ҳақида хабарлар пайдо бўлди. 

Қўшма Штатлар исёнчилар Президент Муҳаммад Базумнинг ҳаётига тажовуз қиладиган бўлса,  уларга қарши чора кўради, деган давлат котиби Энтони Блинкен.

“Биз ҳарбий раҳбарларга Базумнинг хавфсизлиги билан боғлиқ муаммо юзага келса, уларни жавобгарликка тортишимизни аниқ айтдик”, – деди Блинкен журналистларга.

Унинг таъкидлашича, халқаро ҳамжамият Базум ва унинг оиласи хавфсизлигидан хавотирда. Шунингдек, Блинкен Қўшма Штатлар Ғарбий Африка давлатлари иқтисодий ҳамжамиятининг  Нигерда тартибни тиклашга қаратилган саъй-ҳаракатларини қўллаб-қувватлашини таъкидлаган.

С.Раҳимов, ЎзА