“NEW MODA” нафақат дизайнерлар танлови балки имконияти чекланган инсонлар учун ўз иқтидорини намойиш этишга қаратилган пиллапоядир. Ёшлар ўртасида замонавийлик ва миллий руҳ уйғунлашган ҳолда яратилган кийим-кечаклар шу соҳанинг усталари ҳакамлар ҳайъати кўз ўнгида намойиш этилади.

Ўзбекистон Республикаси Президенти ҳузуридаги Ижтимоий ҳимоя миллий агентлиги ташаббуси билан Халқаро инклюзив хаб ва “Осиё рамзи” Ўзбекистон дизайнерлар ва модельерлар ассоциацияси ҳамкорликда ташкил этилган ушбу лойиҳа илк бор юртимизда амалга оширилмоқда. 

Бу орқали ташкилотчилар имконияти чекланган ёшларнинг жамиятга тез мослашиши учун ҳамда иқтидорларини намойиш этиш, замонавий ва истиқболли касбларни эгаллашларида имкониятларини кенгайтиради. 

[gallery-26195]

Ўзбекистоннинг етакчи мутахассислари ва мода усталари ҳар бир иқтидор эгасининг ишларини синчковлик билан кузатиб борди. Жойларда ташкил этилган танловларда 12 ёшдан 20 ёшгача бўлган шу соҳага қизиқувчи ва керакли натижаларни қўлга киритган 60 нафар иштирокчи ўз маҳоратларини намойиш этди. Шундан 10 нафари финал босқичида қатнашди. 

Танлов якунида ғолиб бўлган иштирокчи Франция пойтахти Парижда бўлиб ўтадиган модалар намойишида ўзларининг коллекциялари билан қатнашиш имконига эга бўлади. 

Санжар Тошпўлатов,

Нишонбой Абдувойитов, ЎзА