Исроил бош вазири Биньямин Нетаньяху ўзига қўйилган коррупция айбловлари юзасидан ўлка президенти Исҳоқ Герцогдан расмий авф сўради, деб хабар бермоқда “Euronews” нашри.

Давлат раҳбари бу “ғайриоддий ва катта оқибатларга эга мурожаатни” жиддий кўриб чиқишини билдирган.

Нетаньяху ҳозирча айбловларни тан олмаяпти, бироқ суд жараёнлари мамлакатда кескинлик келтириб чиқарганини айтиб, авф “жамиятни бирлаштиришга хизмат қилишини” таъкидлади. У ҳафтасига уч марта судда қатнашиши бошқарувга халақит қилаётганини билдирди.

Мухолиф тараф эса бу қадамни кескин танқид қилиб, авф берилиши “қонун устуворлигига путур етказиши” ва келажак учун хавфли оқибат яратишини айтмоқда.

Нетаньяху Исроил тарихида суд қилинаётган амалдаги биринчи бош вазирдир. У фирибгарлик, ишончни суиистеъмол қилиш ва пора олишда айбланмоқда. АҚШ етакчиси Дональд Трамп яқинда Герцогга мактуб йўллаб, ишни “сиёсий ва асоссиз” деб атаб, Нетаньяху учун авф сўраган эди.

Мусулмон Зиё, ЎзА