Исроил Бош вазири Биньямин Нетаньяху ҳудуднинг ҳеч бир қисмида Фаластин давлати ташкил этилмаслиги тўғрисидаги эътирозли фикри ўзгармаганини маълум қилди, деб ёзган DW нашри.

- Менга ҳеч кимнинг қўллаб-қувватлаши ёки маърузаси керак эмас, -  деди Нетаньяху якшанба куни бўлиб ўтган ҳукумат йиғилишида.  

Бир кун аввал, АҚШ Президенти Дональд Трампнинг тинчлик режасини қўллаб-қувватловчи БМТ Хавфсизлик Кенгаши резолюцияси лойиҳасида Фаластин давлатчилигига “йўл очиш” ҳақида гап кетгандан кейин ўта ўнг партиялар вазирлари Безалел Смотрич ва Итамар Бен-Гвир ҳукумат раҳбаридан Фаластин давлатини яратиш ғоясини рад этишни талаб қилди.

Бен-Гвир, агар Нетаньяху чора кўрмаса, ҳукумат коалициясидан чиқиш билан таҳдид қилган.

Эслатиб ўтамиз, Нетаньяху сентябрь ойида Оқ уйга ташрифи чоғида Трампнинг режасига рози бўлган. Шундан бери у Фаластин давлати яратилиши имконияти ҳақида гапирмаган.

22 сентябрь куни Франция Президенти Эммануэль Макрон БМТ Бош Ассамблеяси очилишида Фаластин мустақиллигини тан олишини эълон қилди. Бир кун олдин Буюк Британия, Канада, Австралия ва Португалия ҳам худди шундай хабар берди. Умуман, 24 сентябрга келиб, БМТга аъзо 193 давлатдан деярли 160 таси Фаластин мустақиллигини тан олди.

Г.Сатторова, ЎзА