Куни кеча АҚШ Конгресс палаталарининг қўшма йиғилишида Исроил Бош вазири Биньямин Нетаньяху нутқ сўзлади, аммо мажлисда демократларнинг деярли ярми иштирок этмаган. Бу ҳақда “Times Now World” ахборот нашри хабар бермоқда.

Сиёсий таҳлилчилар фикрича, Нетаньяху ва демократлар ўртасидаги муносабатлар Исроил-Ҳамас зиддияти пайтида янада кескинлашди, чунки кўплаб исроилпараст демократлар можаронинг гуманитар харажатларини танқид қила бошлади.

– Исроил Ғазони босиб олишга интилмайди, бироқ анклав бошқа таҳдид туғдирмаслигини таъминлаш учун яқин келажакда хавфсизлик назоратини сақлаб қолиши керак, -деди Нетаньяху ўз нутқида. – Исроил Ҳамаснинг ҳарбий салоҳиятини йўқ қилмагунича ва гаровдагиларнинг барчаси қайтарилмагунича курашишда давом этади.

Шунингдек, у Эроннинг минтақага хавф солиши мумкинлиги ҳақида таъкидлаб, “попугини пасайтириб қўйиш”га чақирди.

– Эронга қарши глобал альянс тузишга чақираман. Исроил билан иноқ бўлган, ярашган барча мамлакатлар ушбу алянсга қўшилишга таклиф қилиниши керак, -деди у.

АҚШ Конгресси қуйи палатаси собиқ спикери Ненси Пелоси Нетаньяхунинг Конгрессдаги нутқини хорижлик таниқли шахсларнинг энг ёмон нутқи деб атади.

Конгрессда йиғилиш ўтказилаётган пайт ташқарида юзлаб яҳудий фаоллари Нетаньяху ва Исроилнинг блокададаги Ғазо секторидаги ҳужумларига қарши норозилик билдириш учун тўпланишди.

Намойишчилар “Ғазо учун ҳаёт”, “Фаластинга озодлик” ва “Геноцидни тўхтатинг” каби шиорлар билан барчанинг эътиборини тортди. Улар томонларни Исроилни қуроллантирмасликка ва Ғазода тезда ўт очишни тўхтатишга чақирган.

– Аниқлик яхшилик ва ёмонлик ўртасидаги фарқни тушунишдан бошланади. Исроилга қарши намойишчиларнинг кўпчилиги ёвузлик томонида туришни танлаганига ақлбовар қилмайди, -деди Нетаньяху мажлис якунида. 

Ў.Алимов, ЎзА