Непал ҳукумати мамлакатда коронавирус тез тарқалаётгани сабабли 6 майдан бошлаб халқаро авиақатновларни тўхтатишини эълон қилди.

Халқаро авиақатновларни тўхтатиш бўйича қарор ўтган якшанба куни қабул қилинган эди. Чунки шу куни мамлакатда коронавирус аниқланган фуқаролар сони 7 минг 137 кишига етди ва бу пандемия бошлангандан буён энг юқори кўрсаткичдир.

Мамлакат соғлиқни сақлаш вазири Хридайеш Трипатининг маълум қилишича, халқаро авиақатновлар 14 майгача тақиқланади.

Халқаро авиақатновларни тўхтатиш ҳақидаги қарор Эверест тоғида альпинистлар тўпланадиган базада коронавирусга чалинганлар сони кўпайиб кетганига тўғри келди. Ҳукуматнинг берган сўнгги маълумотига кўра,  базада 14 нафар хорижлик альпинист ва уларнинг ёрдамчилари коронавирус юқтирган. Айни пайтда улар Непал пойтахти Катманду касалхонасига келтирилган.

Непалда COVID-19 билан касалланганлар сони ҳозиргача жами 351 минг  кишидан ошган,  3,4 минг киши коронавирус қурбони бўлди.