Немис сиёсатчилари ўз ташқи кўриниши учун қанча маблағ сарфлайди? ОАВ бу мавзуни бир неча бор кўтарган. Жорий йил ҳам истисно бўлмади. Бу галги мисоллар сураткаш хизмати билан боғлиқ.

Ноябрь ойи ўрталарида немис нашрлари сиёсатчилар фотографларга қанча маблағ сарфлагани ҳақида ёзди.  

Маълум қилинишича, бундай харажатлар ҳар йили ўзгариб турган. СOVID-19 пандемияси даврида кўплаб тадбирлар кечиктирилган. Кейин сарф ошган. Масалан, пандемиянинг биринчи йили фотографларга ойига ўртача 4360 евро сарфланган, 2022 йилга келиб бу рақам 19 230 еврога кўтарилган, 2023 йил 33 000 еврога яқинлашган. Ўтган йилги харажат сезиларли даражада камайиб, тахминан 20 000еврони ташкил қилди. Жорий йил эса бу сумма сентябрь охирига қадар 19 000 еврога етган.  

Собиқ Канцлер Олаф Шольц ҳам фотограф хизмати учун кўп маблағ сарфлаган. 2022 йил Германия етакчиси сифатида у визажист хизмати учун 40 000 евро тўлаган. Агар фотограф ҳақи ҳам қўшилса, умумий миқдор ярим миллион еврога етади.  

Немис нашрлари август ойи охирида амалдорлар имижи харажатини ҳисоблаб чиқди. 17 ноябрда “Der Spiegel”янги Канцлер Фридрих Мерцнинг соч турмаги учун 12 000 евро ажратилгани ҳақида мақола чиқарди.

Нима учун Мерцнинг стилист ва визажистга қилган харажати ОАВга чиқди? У 2025 йил 6 майда лавозимга ўтиргандан бери косметолог, стилист, визажист ва сартарошга жами 12 500 евро сарфлаган.  

“Шахсий хизмат” харажати ҳақидаги сўров бу йил ҳам Германиядаги мухолиф партия томонидан берилган.

Бундай сўров ўтказиш парламент фракцияларининг одатий амалиёти. Бундестаг депутатлари Германия ҳукуматидан маълумот сўраш ҳуқуқига эга.  

Мухолиф партия вакиллари сиёсатчиларнинг жорий харажати билан қизиқаркан, собиқ ташқи ишлар вазири Анналена Бербок стилист ва визажистга жуда кўп пул беришини ҳам эслатган. DW ёзишича, Бербок мамлакат ичи ва ташқарисидаги сафарлари давомида шахсий визажистини ҳамроҳ қилган. 2022 йил у айни хизмат учун давлат ғазнасидан 136 552 евро олган.  

Ҳозирги иқтисодий ишлар вазири Катерина Райхени ҳам визажист кузатиб юради. Бинобарин, унинг сарфи Бербокникидан анча кам. 2025 йил май ойида лавозимга киришганидан кейинги уч ойда Райхе визажистга тахминан 19 300 евро тўлаган.

<iframe width="640" height="420" src="https://www.youtube.com/embed/7OX17JYtNhQ" title="Nemis siyosatchilari tashqi ko`rinish uchun qancha sarflaydi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов (видео), ЎзА