Фарғона яна Ўзбекистоннинг футбол ривожланган марказига айланмоқда. Ўтган мавсумда “Нефтчи” клубининг мамлакат чемпиони бўлгани бежиз эмас. Бу ерда футболнинг ривожланиши, айниқса, ёшлар орасидан иқтидорлар тайёрлаш ишига катта эътибор берилмоқда.

Биз аввал “Нефтчи” футбол академияси очилгани ҳақида хабар берган эдик. 2026 йилнинг илк кунларидан академия тарбияланувчилари хорижий мураббийга таништирилди. Академияга халқаро тажрибага эга мутахассислар – латвиялик Эдгарс Кленаускс ҳамда украиналик Олександр Близнюк жалб этилди.

Учрашувда Фарғона вилоятида футболга қизиқувчи ёшлар сонининг кўплиги, иқтидорли спортчиларни саралаб олиш, профессионал футболчиларни тайёрлаш ҳамда ҳудудни мамлакатнинг етакчи футбол марказларидан бирига айлантириш асосий вазифа эканлиги таъкидланди. “Нефтчи” футбол академияси нафақат Фарғона клублари, балки мамлакат терма жамоасига ҳам иқтидорли футболчиларни етказиб берувчи мактаб бўлиб қолади, деди мураббийлар.

Муҳаммаджон Обидов, ЎзА