“Bloomberg” нашрининг ёзишича, “Total” таҳлилчилари дунё аста-секин экологик тоза ёқилғига, хусусан, табиий газга ўтишини ишонч билан таъкидламоқда. Компаниядагилар яқин келажакда табиий газ дунё бозорида ҳал қилувчи аҳамият касб этишини қайд этган.

Бундан ташқари, 2050 йилга бориб электр энергиясига бўлган талаб ҳам сезиларли равишда ортади. Электр инсониятнинг энергияга бўлган талабини 40 фоизгача қоплайди. Айни пайтда бу кўрсаткич, тахминан, 20 фоизни ташкил этмоқда.

“Total” қуёш ва шамол энергиясига инвестиция киритишни режалаштирмоқда, шунингдек, аккумулятор ишлаб чиқариш ва автомобиллар учун қувватланиш тармоғини ривожлантиришга ҳам қизиқиш билдирмоқда.

Франциялик мутахассислар ҳисоб-китоби қанчалик тўғри эканини вақт кўрсатади, албатта. Зеро, нефть эрасининг тугаши ҳақидаги башоратлар аввал ҳам бир неча бор билдирилган. Шуни унутмаслик керакки, нефть фақат ёқилғи эмас, балки нефть-кимё саноати учун хом ашё ҳамдир. Мазкур соҳа йил сайин жадал суръатда ривожланмоқда.

Сўнгги хабарларга кўра, жаҳон биржаларида қора олтин нархи кескин пасайиб бораётгани кузатиляпти. Охирги савдолардан олинган маълумотлар шундан гувоҳлик беради.

Кеча “Brent” маркали нефтнинг декабрь ойи учун фьючерс нархи 4,5 фоиз пастлаган ва бир баррели 40,94 доллар этиб белгиланган. Ушбу марканинг ноябрь ойи фьючерс нархи ҳам 4,53 фоизга қулаган ва 40,51 долларни кўрсатган.

“WTI” маркаси ҳам мавжуд позициясини бой бермоқда. Ноябрь ойи учун айни марка остидаги қора олтин нархи 5,12 фоиз тушиб, бир баррели 38,52 долларга нархланди.

Нефть нархига Ливиядан тарқатилган янгилик ҳам босим ўтказмоқда. ОАВ маълум қилишича, куни кеча “Arabian Gulf Oil Co” (Agoco) йирик нефть конидан суткасига 200 минг баррел қора олтин қазиб олина бошланган.

Бундан ташқари, Америка нефть институти ва АҚШ энергетика вазирлигининг мамлакатдаги нефть захираларига оид статистик маълумотлари ҳам биржа савдоларини хавотирга солмоқда. Бинобарин, Рейтер таҳлилчилари таъкидлашича, эълон қилинган статистик маълумотлар мамлакат омборларида нефть захираси ортганини кўрсатмоқда.