Үндістанның Уттар-Прадеш штатында соңғы тәулікте жауған нөсер жауын мен найзағай салдарынан кемінде 45 адам қаза тапты.

 Times of India хабарлауынша, табиғи апаттың салдары елдің әртүрлі өңірінде ауыр зардаптарға әкелген.

Билік өкілдерінің мәліметінше, кейбір тұрғындар найзағай түсуінен көз жұмса, өзгелері ағаштар құлауынан және өзге де төтенше жағдайлардан опат болған. Дауыл кезіндегі жел екпіні сағатына 60–100 шақырымға дейін жеткен.

Синоптиктердің болжамына сәйкес, алдағы күндері де найзағайлы жауын-шашынның күшеюі мүмкін. Жауын-шашын негізінен жеңіл және орташа деңгейде болмақ.

Үндістан үкіметі құрбандардың отбасына өтемақы төлеу туралы шешім қабылдады. Сонымен қатар, жергілікті билік мүлік пен ауыл шаруашылығына келген залалды бағалап жатыр. Дауылдан зардап шеккен халыққа қолдау көрсетілетіні айтылды.

Ауыл шаруашылығы да табиғаттың бұл тосын мінезінен жапа шеккен. Манго бақтарына қауіп төніп тұр. Мамандар фермерлерге жаңбырдан кейінгі ылғалды ортада пайда болатын зиянкестерге қарсы шұғыл шаралар қабылдауға кеңес беруде.