Үндістан Әскери-әуе күштеріне тиесілі Jaguar жойғыш ұшағы оқу-жаттығу ұшуын орындау кезінде Раджастхан штатында апатқа ұшырады.

Hindustan Times басылымының хабарлауынша, оқиға 9 шілде күні, жергілікті уақытпен сағат 13:25 шамасында орын алған. Ұшақ ауыл шаруашылығы алқабына құлаған. Бортта болған екі ұшқыштың екеуі де оқиға орнында қаза тапты.

Әскери-әуе күштерінің ресми мәлімдемесіне сәйкес, азаматтық инфрақұрылымға ешқандай зиян келмеген.

Апаттың нақты себептерін анықтау мақсатында арнайы тергеу комиссиясы құрылып, қазіргі таңда оқиға орнында қажетті зерттеу жұмыстары жүргізіліп жатыр.