Дели мен Бейжің 2020 жылғы шекара қақтығысынан кейін үзілген байланысты жандандыру мақсатында тікелей әуе рейстерін қайта ашу, сауда және инвестициялық ынтымақтастықты арттыруға уағдаласты.

Үндістан Сыртқы істер министрлігінің мәлімдемесінде, үш пункт бойынша шекаралық сауданы қалпына келтіру, виза рәсімдерін жеңілдету қарастырылғаны айтылған. Алайда әуе рейстерінің нақты қайта жандану күні әлі жарияланбады.

Қытайдың сыртқы істер министрі Ван И Үндістанның ұлттық қауіпсіздік жөніндегі кеңесшісі Аджит Довалмен келіссөздер жүргізу үшін Нью-Делиға екі күндік сапармен барды.

Келіссөздер барысында шекара дауы, әсіресе әскерлерді бөліп орналастыру және шекараны делимитациялау сынды маңызды мәселелер талқыланды.

– Шекара мәселесін үйлестіру және демаркация бойынша келіссөздер жүргізу шарттарын әзірлеу үшін жұмыс тобын құруға келістік, – делінген ҚХР СІМ мәлімдемесінде.