Санитария-эпидемиологик назоратнинг кучайтирилиши юқумли касалликлар тарқалишининг олдини олишда муҳим омил ҳисобланади. Шу йўналишда Сирдарё вилоятининг Мирзаобод туманида санитария-эпидемиология соҳаси ходимлари томонидан олиб борилган тизимли санитария-профилактик назорат тадбирлари натижасида юқумли ва паразитар касалликлар кўрсаткичларининг пасайиши қайд этилди.

Соҳа ходимларининг маълумотларига кўра, 2025 йилда туманда жами 1139 та юқумли ва паразитар касаллик ҳолати аниқланган бўлиб, бу кўрсаткич ўтган 2024 йилга нисбатан камайган. Мутахассислар бундай ижобий динамикани тасодифий ҳолат эмас, балки санитария назоратининг барча бўғинларда кучайтирилгани ҳамда профилактика ишларининг тизимли йўлга қўйилгани натижаси сифатида баҳоламоқда.

— Назорат деганда фақат текширувни эмас, балки касалликка олиб келувчи омилларни олдиндан аниқлаш, хавфли ҳолатларни бартараф этиш ва аҳолини огоҳлантиришни тушунамиз. Қачонки назорат узлуксиз ва аниқ механизмга асосланган бўлса, касаллик тарқалиши табиий равишда чекланади, — дейди туман санитария-эпидемиологик осойишталик ва жамоат саломатлиги бўлими бошлиғи Комилжон Тагаев.

Назорат самарасини акс эттирувчи муҳим кўрсаткичлардан бири ҳайвонлар томонидан тишлаш ҳолатларининг камайганидир. Хусусан, 2025 йилда антирабик хизматга мурожаат қилганлар сони 129 нафарни ташкил этиб, бу ўтган йилга нисбатан 12 тага кам. Бу ҳолат аҳоли ўртасида олиб борилган профилактик тушунтириш ишлари ҳамда хабардорлик даражасининг ошгани билан изоҳланмоқда.

Вирусли гепатит “А” касаллигининг олдини олишда ҳам қатъий назорат ва режали ёндашув ўз самарасини берди. Жорий йилда 812 нафар бола ихтиёрий равишда эмланиб, натижада ушбу касаллик бўйича касалланиш ҳолатлари бир йил ичида бир неча баробарга камайди.

Мутахассисларнинг таъкидлашича, эришилган натижалар фақат эмлаш билан чекланиб қолмай, балки ичимлик суви сифати, озиқ-овқат маҳсулотлари хавфсизлиги ҳамда болалар муассасаларида санитария қоидаларига қатъий риоя этилиши устидан олиб борилган доимий лаборатория назорати билан ҳам боғлиқ.

Йил давомида туманда 464 та касаллик ўчоғида, шунингдек, профилактик мақсадларда жами 26 минг 858 квадрат метр майдонда дезинфекция ишлари амалга оширилди. Барча тадбирлар белгиланган санитария меъёрлари ва талабларига қатъий риоя этилган ҳолда ташкил этилди.

Паразитологик ва бактериологик лабораториялар томонидан озиқ-овқат маҳсулотлари, ичимлик суви, ҳаво муҳити ҳамда тиббий муассасаларда санитария ҳолати юзасидан доимий таҳлил ишлари олиб борилди. Аниқланган камчиликларни бартараф этиш бўйича тезкор чоралар кўрилиб, профилактик тадбирлар янада кучайтирилди.

Мутахассислар фикрича, санитария назорати фақат мавжуд ҳолатга жавоб эмас, балки келажакка қаратилган барқарор профилактик инвестиция ҳисобланади. Назорат бор жойда хавфлар эрта аниқланади, касаллик чекланади ва жамият саломатлиги барқарор сақланади.

Ғулом Примов, ЎзА мухбири