Маҳалла ёшлари ўртасида ўтказилаётган "Беш ташаббус олимпиадаси" доирасидаги футбол бўйича ДХХ кубоги мусобақаларининг Фарғона вилоят босқичи финал ўйини бўлиб ўтди.

Фарғона шаҳридаги “Истиқлол” ўйингоҳида бўлиб ўтган учрашувда Тошлоқ туманининг Найман ҳамда Қўштепа туманининг Борот маҳаллалари жамоалари ўзаро баҳс олиб борди. Кескин курашлар остида ўтган учрашувнинг асосий вақти 1:1 ҳисобида дуранг билан якунланди.  

Пенальтилар сериясида Тошлоқ тумани “Найман” маҳалласи жамоаси аъзолари ғолиб чиқди. Мазкур мусобақа ёшларни спортга қизиқтириш ва жамоа сифатида бирлашишида муҳим ўрин тутмоқда.  

Бу йил тўртинчи маротаба ўтказилган футбол ва мини-футбол бўйича ДХХ кубогининг маҳалла, сектор, туман ва шаҳар босқичларида вилоятдаги 1 минг 62 та маҳалла фуқаролар йиғинидан 30 минг нафарга яқин 16-30 ёшдаги ўсмир-ёшлари иштирок этди.  

Мини футбол бўйича ўтказилган мусобақаларнинг вилоят босқичида Марғилон шаҳрининг “Янгибоғ” маҳалла фуқаролар йиғини жамоаси 1-ўринни эгаллаган бўлса, қизлар ўртасида ўтказилган мусобақаларда Тошлоқ тумани жамоаси ғолибликни қўлга киритди.  

Финал учрашуви якунлангач футбол ва мини-футбол бўйича ДХХ кубогининг бу йилги ғолиб ҳамда совриндорлари тақдирланди.  

Ўйингоҳга йиғилган мухлислар учун эл севган санъаткорлар иштирокида катта концерт дастури ҳам тақдим этилди.  

М.Сулаймонов, ЎзА мухбири