2021 йил ҳосили учун Навоий вилоятида 38 минг 39 гектар майдонга кузги бошоқли дон экиш мўлжалланган бўлиб, унинг 8 минг 565 гектари очиқ майдонга, 29 минг 474 гектари ғўза қатор орасига экилиши режалаштирилган.

Айни пайтда “Навоийдонмаҳсулотлари” АЖ корхонасининг уруғлик дон тайёрлаш шохобчалари томонидан 2020 йил ҳосилидан жами 9705 тонна, шундан 1-уруғлик цехда 3268 тонна, 2-уруғлик цехда 6436 тонна уруғлик дон жамғарилган.

– Ғалла майдонларини экишга тайёрлаш, шунингдек, 2021 йил ҳосили учун уруғлик донни саралаш, дорилаш ишларининг бориши, уруғлик донни қайта ишлаш жараёнлари “Ўзагроинспекция” вилоят бошқармаси ходимлари назорати остида давом этмоқда, – дейди “Ўзагроинспекция” вилоят бошқармаси катта инспектори Аббос Ризоқулов. – Жамғарилган уруғликнинг 206 тоннаси “Супер элита” авлодли, 3890,6 тоннаси “Элита” авлодли, 5607,9 тоннаси “R-1” авлодли уруғлик донларни ташкил этади. Бугунги кунда режа бўйича дорилаш ишлари белгиланган 7385 тонна ўрнига 8175 тонна ёки 84,2 фоизга бажарилиб, 368 тонна ортиқча дориланган.

Дон – ризқ-рўзимиз. Донимизнинг мўл бўлиши эса дастурхонларимиз тўкинлиги, юртимиз фаровонлигидан дарак. Буни тўғри англаган ғаллакорларимиз ҳозирданоқ мавжуд ғалла майдонларини озиқлантириш, бу борадаги агротехник тадбирларни кечиктирмай олиб боришга катта эътибор каратишган. Жорий йил Қизилтепа туманида 10 минг 224 гектар майдонга кузги бошоқли дон экиш кўзда тутилган. Хусусан, туманнинг “Арабон” ҳудудида жойлашган дон ва дуккакли экинлар илмий-тадқиқот институти Навоий ҳудудий филиали томонидан синов тариқасида 50 гектар майдонга ғўза қатор орасига уруғлик экилади.

– Уруғлик доннинг “Аср”, “Гром”, “Давр” ва бошқа навларидан экишни мўлжаллаб турибмиз, – дейди филиал директори Абубакир Тоғаев. – Дон униб чиқиши ва парвариши сифат даражасида бўлишига аҳамият қаратганмиз. Шунга кўра, Туркиянинг минерал ўғитлар ишлаб чиқарувчи “Агро-Анталя” фирмаси билан ҳамкорликни йўлга қўйдик. Бугунги кунда 420 килограмм буғдойнинг ўсиб чиқишидан то дон бўлганча жараённи қамраб оладиган кимёвий ўғитлар келтирилиб, захира яратилган. Ҳосилдорликни 70-80 центнерга олиб чиқишни режа қилганмиз.

Вилоятда 10 сентябрдан бошланадиган экиш тадбирлари 10 октябргача якунланиши белгиланган.