Oylik doirasida tizim xodimlari tomonidan mahalla fuqarolar yigʻinlari raislari ishtirokida kunlik yoʻriqnomalar tashkil etildi. Huquqbuzarliklarning barvaqt oldini olish borasida jamoat tartibini saqlash, yoʻl harakati xavfsizligini taʼminlash hamda huquqbuzarliklar profilaktikasini kuchaytirish maqsadida guruhlar faoliyati yoʻlga qoʻyildi.

Fuqarolarga karantin talablariga toʻliq rioya etishlari yuzasidan targʻibot-tashviqot ishlari olib borilib, aholi orasida koʻp nusxada koʻrgazmali bukletlar koʻcha-kuyda, jamoat joylarida, shuningdek, bozorlar, savdo doʻkonlari va xizmat koʻrsatish obyektlariga tarqatilmoqda.

– Shu bilan birgalikda Navoiy shahar hududida bemaqsad yurgan va aniq turar joyiga ega boʻlmagan shaxslar bilan ishlash guruhi tomonidan tadbirlar oʻtkazilib, tashkil etilgan “Filtr guruhi”ga olib kelinmoqda, – deydi viloyat IIB axborot xizmati rahbari Oʻktam Usmonov. – Bu yerda ularning shaxsiga va yashash manzillariga aniqlik kiritilib, shaxsi maʼlum boʻlmagan va shahar hududida aniq yashash manziliga ega boʻlmagan fuqarolarni reabilitatsiya markazlariga joylashtirish choralari koʻrilmoqda. Shuningdek, Navoiy shahar hududida karantin talablariga amal qilmasdan noqonuniy ravishda avtotransport vositalarida odam tashish bilan shugʻullanuvchilarni aniqlash guruhi tomonidan reyd tadbirlari tashkil etilib, oʻrnatilgan qoidalarga rioya qilmagan haydovchilarga nisbatan maʼmuriy javobgarlik masalalari koʻrildi.

Mazkur jarayonda soha vakillarining kunlik ishlari umumlashtirilib, nazoratga olingan va aniqlangan kamchiliklarni bartaraf etish choralari koʻrilmoqda.