Нурота тумани Ғафур Ғулом маҳалласидаги 13-давлат мактабгача таълим ташкилоти реконструкция қилиниб, фойдаланишга топширилди.

Тадбирда туман сектор раҳбарлари, мактабгача таълим бўлимининг масъуллари, нуронийлар, тарбияланувчиларнинг ота-оналари иштирок этди. 150 ўринли ушбу мактабгача таълим ташкилоти 3 қаватдан иборат бўлиб, 2022 йил Инвестиция дастури асосида 3 миллиард 787 миллион сўм маблағ эвазига таъмирланди.

Мактабгача таълим ташкилоти кенг ва шинам хоналардан иборат бўлиб, замонавий мебел жиҳозлари ҳамда ўқув-услубий кўргазмали қуроллар билан тўлиқ таъминланган.

Нурота туманида “Яшил макон” умуммиллий лойиҳаси доирасида “Долзарб 40 кунлик” кўчат экиш тадбирлари уюшқоқлик билан олиб борилмоқда.

Туманда 259 минг дона манзарали ва мевали кўчатлар экиш режалаштирилган. Ҳозирги кунга қадар 70 минг донага яқин мевали ва манзарали кўчатлар экилди.

Президентимизнинг 2022 йил 30 октябрдаги “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида” ги фармони ижросини таъминлаш мақсадида маҳаллаларда оммавий спортни янада ривожлантириш, ёшларни жисмонан соғлом ва маънан баркамол қилиб тарбиялаш мақсадида Ўзбекистон “Маҳалла” хайрия жамоат фонди ва бир қатор ҳамкор ташкилотлар томонидан 13-16 ёшдаги ўсмирлар ўртасида стол тенниси бўйича “Маҳалла кубоги” республика турнири ўтказилмоқда.

Нурота туманидаги 42-умумтаълим мактабида мазкур турнирнинг туман босқичи ўтказилди. 28 та маҳалла жамоалари ўртасида ўтказилган мусобақада “Нурфахр” маҳалласи жамоаси аъзолари Аббосбек Аъзамов ва Сабрина Нарзиевалар биринчиликни эгаллаб, вилоят босқичига йўлланмани қўлга киритди.

Ёшлар ишлари агентлиги томонидан “Йилнинг энг намунали ёшлар етакчиси” танловининг Нурота тумани босқичи бўлиб ўтди. Унда ёшлар етакчилари 5 та шарт бўйича ўзаро беллашди.

Якунда “Сувлиқ” маҳалла фуқаролари йиғини ёшлар етакчиси Жасур Турсинмуратов биринчи, Сайидато маҳалла фуқаролари йиғини ёшлар етакчиси Сирожиддин Сирочов иккинчи ва Ибн Сино маҳалла фуқаролари йиғини ёшлар етакчиси Жонибек Расулов учинчи ўринни қўлга киритди.

Абдували Бўриев, ЎзА