Yurtimizning barcha go‘shalarida xalqimizning azaliy va ezgu qadriyatlarini o‘zida mujassam etgan, ona tabiat va odamlar ruhiyatida yuz beradigan yasharish va yangilanishni to‘la namoyon qilib kelgan Navro‘zi olam keng nishonlanmoqda.

Bu bayram barcha korxona va tashkilotlarda bo‘lgani kabi Navoiy viloyati sudlarida ham umumxalq sayillari shaklida ko‘tarinki kayfiyatda nishonlandi.

Bir tomonda doshqozonlarda milliy taomlarimiz qaynab turgan bo‘lsa, yana bir tomonda folklor ansambllari tomonidan bahoriy kayfiyat ulashuvchi kuy-qo‘shiqlar aytilib, raqslarga tushildi.

Bundan tashqari, milliyligimizni namoyon qilish maqsadida sud binosida milliy liboslar, turli xil buyumlar ko‘rgazmasi tashkil etildi.

Navro‘z bayrami arafasida sudya va sud xodimlarining dasturxonlari to‘kin-sochin bo‘lishini ta’minlash va ularning bozorga borib ortiqcha vaqt ketkazishlarining oldini olish maqsadida viloyat sudi binosida arzonlashtirilgan qishloq qo‘jaligi yarmarkasi ham tashkil etilib, barcha turdagi mahsulotlar savdosi yo‘lga qo‘yildi.  

Shu kunlarda viloyatning barcha hududlarida Navro‘zi olam keng tantana qilinmoqda.

A.Bo‘riyev, O‘zA muxbiri