Rossiyada Navoiy va Bobur tavalludining muhim sanalari nishonlandi

Buyuk shoir va mutafakkir Alisher Navoiy tavalludining 581 yilligi hamda Zahiriddin Muhammad Bobur tavalludining 539 yilligi munosabati bilan mazkur sanalarga bag‘ishlab 2022 yilning 14 fevral kuni Rossiyaning  akademik doira vakillari, xususan, taniqli adabiyotchilar, madaniyatshunos, navoiyshunos, boburshunos olimlar ishtirokida ijodiy uchrashuv tashkil etildi.

Mamlakatimizning Rossiyadagi Bosh konsulxona binosida tashkil etilgan tadbirda Rossiyada 2021 yil 10-12 dekabr kunlari A.Navoiyning 580 yilligi yubileyiga bag‘ishlangan ilmiy anjuman o‘tkazilganligi e’tirof etildi.

Leningrad viloyati hukumatining mahalliy o‘zini-o‘zi boshqarish, millatlararo munosabatlar bo‘yicha qo‘mitasi raisi maslahatchisi V.V.Mixaylenko Leningrad «Do‘stlar uyi»da Leningrad viloyati va Sankt-Peterburg shahrida yagona bo‘lgan interaktiv o‘zbek madaniyat muzeyi tashkil etilganligini qayd etdi. Shuningdek, olim  A.Navoiyning hayoti va ijodi to‘g‘risida mahalliy kelajak avlodga kengroq tanishtirish maqsadida ushbu muassasa hududida shoir sharafiga yodgorlik o‘rnatish yuzasidan taklif bildirdi.

Bundan tashqari, Belarus yozuvchilar uyushmasi a’zosi, hozirda Sankt-Peterburg shahrida istiqomat va ijod qilib kelayotgan vatandoshimiz I.R.Kuchiyev tomonidan tayyorlangan «Alisher Navoiy: qadim zamonning buyuk ustozi – hozirgi zamon buyuk ustozidir» va «Zahiriddin Muhammad Bobur» nomli maqolalar ijodiy uchrashuvga kelgan  mehmonlar tomonidan katta qiziqish bilan tinglandi va tadbir so‘ngida I.Kuchiyev tomonidan Alisher Navoiy tavalludiga bag‘ishlab yaratilgan «Abadiylikka besh qadam» nomli asari badiiy kecha ishtirokchilariga taqdim etildi.

Talabalar tomonidan o‘zbek va rus tillarida o‘qib eshittirilgan Alisher Navoiy va Zahiriddin Muhammad Bobur qalamiga mansub g‘azallar tadbir ishtirokchilarida katta qiziqish uyg‘otdi.