Маълумки, жорий йил 15 сентябрдан 15 октябргача аксарият йўловчи поездлари “Тошкент-Жанубий” темир йўл вокзалидан қатновини амалга оширмоқда. Пойтахтга темир йўл орқали Жанубдан кириш дарвозаси ҳисобланган ушбу масканда, йўловчилар учун барча қулайликлар яратилган. Жумладан, вокзалга киришда бир босқичли назорат нуқталари, чиптахоналар, кутиш заллари туну-кун фаолият олиб бормоқда. Бундан ташқари йўловчиларни кузатиш ва кутиб олиш учун келадиган автомобиллар учун алоҳида автотураргоҳ ҳам ташкил қилинди. Бу ерда бир вақтнинг ўзида 150 тагача автомобил қўйиш имконияти мавжуд. Ана шундай қулайликларга эга бўлган “Тошкент-Жанубий” темир йўл вокзалига 23 сентябрь куни Қозоғистоннинг Олма-ота шаҳридан ўз ҳаракатини бошлаган навбатдаги туристик чартер поезд етиб келди.

10 йилдан буён қатновини амалга ошираётган мазкур поезд илк бор Жанубий вокзалда кутиб олинди.  

Америкадан келган 65 нафарга яқин сайёҳ ушбу поездда Марказий Осиё давлатлари бўйлаб саёҳат қилишмоқда. Ҳозирги кунда "Orient Silk Road Express" номи билан "Олма-ота — Бишкек — Тошкент — Қўқон — Қамаши — Китоб — Самарқанд — Хўжанд — Хива — Бухоро — Тошкент — Бухоро — Хива — Хўжанд — Самарқанд — Китоб — Қамаши — Қўқон — Тошкент — Бишкек — Олма-ота" йўналишида турли давлатлар сайёҳларига хизмат кўрсатиб келмоқда.  

Поезд 9 та асосий ва 1 та захира вагондан иборат. Яъни, 4 та люкс  (ҳар бири 8 ўринли), 2 та юқори қулайликдаги ўз душига эга бўлган (16 ўринли), 2 та ресторан ва 1 та купе вагон мавжуд.  

Ушбу туристик чартер поездида мамлатимизга келган сайёҳлар 9 кун давомида юртимизнинг тарихий шаҳарларини томоша қиладилар. Шундан сўнг, қўшни давлатларга жўнаб кетадилар.

<iframe width="560" height="315" src="https://www.youtube.com/embed/cQMGGpsX91Y?si=n_wzNP_Wkr7xDYR9" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Н. Мардонов, Ё. Мелибоев  ЎзА