Янги футбол мавсумига асосан хорижда тайёргарлик кўрган Наманганинг “Навбаҳор” клуби Туркиянинг Белек шаҳридаги навбатдаги халқаро йиғини якунида иккита ўртоқлик учрашувида майдонга тушди.

Қозоғистон чемпионати иштирокчиси Семейнинг “Алтай” жамоасига қарши баҳсда “Лочинлар” бош мураббийи Тимур Кападзе таркибга янги жалб қилинган ва кўрикда синовда бўлиб турган ўйинчиларга кўпроқ эътибор қаратди. Жанговар дуранг (1:1) қайд этилган ўйинда наманганликларниннг голига 25 дақиқада Диёр Холматов муаллифлик қилди.  

Сўнгги халқаро ўртоқлик ўйинида эса ҳамюртларимиз Грузиянинг энг совриндор жамоаларидан бири саналган Тбилисининг “Динамо” клубига қарши баҳс олиб борди. Эътиборлиси, мазкур баҳсда ҳам кучлар тенг келди – 1:1.

Қайд этиш лозимки, учрашувга тўхталишлар учун ҳакам томонидан қўшиб берилган дақиқаларда захирадан майдонга туширилган африкалик Катулонди Кати “Навбаҳор”ни мағлубиятдан қутқариб қолди.

Клуб раҳбарияти “Суперлига-2026” старти арафасида навбатдаги трансферларини эълон қилди. Хусусан, Ўзбекистон миллий терма жамоасига номзод ҳужумчи Ҳусайн Норчаев, бразилиялик “вингер” Алекс Фернандес, грузиялик ҳимоячи Гиорги Жгереная ва конголик ҳужумчи Катулонди Кати билан шартнома имзоланди.

24 ёшли Ҳусайн Норчаев ўз фаолияти давомида Қаршининг “Насаф”, Россиянинг “Алания” (Владикавказ) Фарғонанинг “Нефтчи” клубларида тўп сурган. У ўтган мавсумда қаршиликлар сафида 30 ўйинда 14 та гол урган. Ҳужумчи мавсумнинг стартини ўтказиб юборади, у айни вақтда Италияда жароҳатдан тикланмоқда.

23 ёшли Фернандес эса Бразилиянинг “Атлетико Минейро”, “Сантос”, “Черно Море”, Россиянинг “Балтика”, Озарбайжоннинг “Нефтчи” жамоалари шарафинни ҳимоя қилган. У сўнгги ўйинини 2025 йил май ойида ўтказган.

32 ёшли Гиорги Жгереная фаолияти давомида Грузиянинг “Гагра”, “Норча Динамоэли”, “Самтредиа” “Мерания”, Украинанинг “Иличевес”, “Николаев”, “Динамо-2” жамоаларида ўйнаган. 2021 йилдан буён Грузия чемпионати иштирокчиси – Тбилисининг “Иберия” жамоасида эди. У Грузиянинг турли ёшдаги терма жамоаларида майдонга тушган.  

27 ёшли Катулонди Кати  ҳозирга қадар Конго Демократик Республикасининг “Дофен Нуар”, “Мотема Пембе” жамоаларида тўп тепган. 2022 йилдан буён эса Марокашнинг “Ҳассания” жамоасида фаолият юритиб келаётганди.

Эслатиб ўтамиз: “Навбаҳор” жамоаси янги мавсумни шу йилнинг 28 февраль куни Самарқанд шаҳрида суперлиганинг дастлабки тури доирасида маҳаллий “Динамо” клубига қарши ўйин билан бошлайди.

Оқилхон Дадабоев, ЎзА