Футбол бўйича мамлакат миллий чемпионати суперлигасининг қолдирилган 8-тур ўйинлари бўлиб ўтди. Унда Наманганнинг “Навбаҳор” жамоаси ўз майдонида “Бухоро” клубини қабул қилди.
Ушбу учрашувнинг аҳамияти мезбонлар учун алоҳида ўрин тутарди. Боиси, ғалаба “Лочинлар”ни мусобақанинг биринчи даврасини пешқадам сифатида якунлаш имкониятини берарди. Айни шундан ҳам Самвел Бабаян шогирдлари кечиккан баҳсни кўтаринкилик билан бошлади. Биринчи бўлимда асосан ўйин асосан кўҳна шаҳарликларнинг дарвозаси олдида кечди. Мезбонларнинг шиддатли зарбаларни қайтаришда меҳмонлар посбони Сардор Қобулжонов жамоадошларининг жонига аро кирди.
Иккинчи бўлимда бухоролик футболчилар рақибга нисбатан тенг ўйнаб, муносиб қаршилик кўрсата олди. Суперлига етакчиларидан бири ва мусобақа жадвалида сўнгги ўринларда бораётган клубнинг майдонда шижоат билан баҳслашиши ўзбек футболининг савияси ўсиб бораётганидан далолат беради. 81-дақиқада майдон эгалари стандарт вазият натижасида ҳисобни очди. Жасурбек Яхшибоевнинг бурчакдан узатган тўпини болқонлик легионер Милош Милович боши билан дарвозага аниқ йўллади. Ушбу гол “Навбаҳор” га очколар сонини 29 та етказгани ҳолда, биринчи даврани карвонбоши сифатида якунлашини таъминлади.
Оқилхон Дадабоев, ЎзА.