Футбол бўйича Ўзбекистон Суперлигасининг 3-тур учрашувлари кутилмаган натижаларга бой ўтмоқда.

Турнинг дастлабки баҳси Фарғона шаҳридаги "Истиқлол" стадионида бўлиб ўтди. “Нефтчи” — “Андижон” учрашувида мезбонлар 3:0 ҳисобида ишончли ғалабага эришиб, очколарини 9 тага етказди. “Нефтчи” жамоасига ғалаба келтирган голларга Алишер Одилов, Жамшид Искандеров ва Анваржон Ғофуров муаллифлик қилди.

Турнинг яна бир баҳсида “Машъал” ўз майдонида “Қизилқум”ни қабул қилди. Сафарда ўйнаганига қарамай, меҳмонлар ўйин тизгинини қўлга олди ва учрашувни 2:0 ҳисобида ўз фойдасига ҳал қилди.

Турнинг марказий учрашуви "Пахтакор" - "Навбаҳор" жамоалари ўртасида кечди. Ўйин шиддатли ва кескин курашлар остида ўтди. Биринчи бўлимда ҳар икки жамоа бир қатор хавфли вазиятлар яратган бўлса-да, ҳисоб очилмади.

Иккинчи бўлимни фаол бошлаган “Навбаҳор” футболчилари 47-дақиқада ҳисобни очди. Диёр Холматовнинг зарбасидан қайтган тўпни конголик ҳужумчи Катулонди Кати дарвоза тўрига аниқ йўллади. 65-дақиқада эса мезбонлар жарима майдончасида қоида бузди ва учрашув бош ҳаками Фирдавс Норсафаров пенальти белгилади. Уни Русланбек Жиянов муваффақиятли амалга оширди.

Шу тариқа, турнинг марказий ўйинида “Навбаҳор” сафарда 2:0 ҳисобида ғалаба қозониб, очколарини 6 тага етказди. “Пахтакор” ҳам 6 очко билан қолди.

Эътиборлиси, наманганликлар бу ғалабани қарийб 31 йил кутди. Чунки жамоа Тошкентда “Пахтакор” устидан сўнгги бор 1995 йил 2:1 ҳисобида ғалаба қозонган эди.

Бугун эса миллий чемпионатнинг 3-туридан ўрин олган “Сурхон” — “Бунёдкор”, “Локомотив” — “Қўқон-1912” ва “Бухоро” — “Хоразм” учрашувлари бўлиб ўтади.

<iframe width="650" height="420" src="https://www.youtube.com/embed/iaWPAzfl-Kg" title="“Navbahor” 31 yil kutilgan natijani qayd etdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жавоҳир Тошхўжаев, Карим Худойқулов, ЎзА