Наманган шаҳридаги “Марказий” ўйингоҳда футбол бўйича Ўзбекистон кубогининг ярим финали доирасида мезбон – “Навбаҳор” ва Жиззахнинг “Сўғдиёна” жамоалари баҳс олиб борди.

Мухлислар 90+9 дақиқадан иборат ўйиннинг асосий вақти, унга қўшиб берилган 30 дақиқалик “экстра-тайм”лар ва "пенальтилар серияси”ни ҳаяжон билан томоша қилди. Баҳс шиддатли  бўлди.

Суперлигада совринли ўринлар учун курашдан деярли четга чиққан “Сўғдиёна” бор умидини кубок курашига тикканлиги ушбу учрашувда яққол кўзга ташланди.

Беллашувнинг 71-дақиқасида меҳмонлар ҳимоячиси Абдужалил Маназаров “Навбаҳор” аъзоси Даврон Ҳошимовга нисбатан қўполлик ишлатгани сабабли иккинчи марта олинган сариқ карточка туфайли майдондан четлатилди. “Сўғдиёна” футболчилари ўйиннинг қолган вақтида майдонда бир киши кам бўлиб қолганига қарамай муносиб қаршилик кўрсатди.

Учрашувнинг асосий вақтида ҳисоб очилмагач, 15 дақиқалик икки бўлимдан иборат “экстра-тайм”ларда баҳс давом этди.

Пенальтилар баҳсида 3:1 ҳисобида устун келган Наманганнинг “Навбаҳор” жамоаси 24  йиллик танаффусдан сўнг, мамлакат кубоги финалига йўлланмани қўлга киритди.

Эслатиб ўтамиз, “Лочинлар” охирги марта 1998 йили кубок финалига чиқиб, Фарғонанинг “Нефтчи” жамоасини 2:0 ҳисобида мағлубиятга учратган ҳолда, биллур совринга эга чиққанди.

Ўзбекистон кубогининг бу йилги соҳибини аниқлаб берадиган финал баҳси 30 октябрь куни Бухоро шаҳрида ўтказилади, унда “Навбаҳор” ва “Насаф” жамоалари ғолиблик учун куч синашади.

Оқилхон Дадабоев, ЎзА