“Навбаҳор”нинг стратегияси ўзгаради, 2021 йилдан жамоада фақат маҳаллий ёшлар ўйнайди
Йиғилишда вилоят раҳбари таъкидлаганидек, эндиликда “Навбаҳор” клубининг стратегияси ўзгаради ва жамоа бундан кейин фақат маҳаллий футболчилар ҳисобига шакллантирилади.
Наманган шаҳридаги “Марказий” ўйингоҳда вилоят ҳокими вазифасини бажарувчи, вилоят футбол ассоциацияси президенти Шавкат Абдураззоқов “Навбаҳор” клуби мутасаддилари, мураббийлари ва футболчилари, бир гуруҳ мухлислар билан учрашди.
Йиғилишда вилоят раҳбари таъкидлаганидек, эндиликда “Навбаҳор” клубининг стратегияси ўзгаради ва жамоа бундан кейин фақат маҳаллий футболчилар ҳисобига шакллантирилади.
– Гарчи таркиб бўйича Суперлиганинг унча-бунча жамоасидан қолишмасада, анча маҳоратли футболчиларга эга бўлса-да, “Навбаҳор” тўққиз ўйиндан буён ғалаба қозона олмаяпти. Бунга жамоа мураббийлари футболчиларнинг кўпчилиги коронавирусга чалинганини баҳона қилди.
Жорий мавсум бошида жамоанинг олдига Осиё чемпионлар лигаси йўлланмасини қўлга киритиш вазифаси қўйилган эди. Бироқ жамоа кўп очко йўқотди. Сўнгги уч йил давомида, яъни 2017 йилдан 2020 йилнинг мартигача “Навбаҳор” президенти сифатида фаолият олиб бордим. Ўша пайтдан бошлаб ёш футболчиларга эътиборни кучайтирганимизда, ҳозиргача анча иқтидорли футболчилар етишиб чиққан бўларди.
Бироқ биз “Навбаҳор”ни юксалтириш, жамоанинг совриндорлар сафидан жой олиши, Осиё чемпионлар лигаси йўлланмасини қўлга киритиши учун ҳаракат қилдик. Лекин бу кутилган самарани бермади. Энди “Навбаҳор”нинг стратегияси ўзгаради ва асосий эътибор маҳоратли ёшларга қаратилади.
2021 йилдан жамоа шарафини фақат маҳаллий ёшлар ҳимоя қилади. Барча наманганлик иқтидорли, ёш футболчиларни қўллаб-қувватлаймиз, инвестицияни маҳаллий ёш, истеъдодли футболчиларни етиштириш учун йўналтирамиз.
Барча футбол мактаблари ва академиялари энди “Навбаҳор” тасарруфига ўтади, уларнинг тарбияланувчилари энг аввало, “Навбаҳор” билан шартнома имзолайди.
Наманганимиз фахри, юртимизнинг таниқли футболчиси Одил Аҳмедов билан ҳамкорлик қиламиз, маслаҳатлашамиз. Одил футболчилик фаолиятини “Навбаҳор”да якунламоқчи, у жамоа учун қўлидан келганича ёрдам беришга тайёр, - деди Шавкат Абдураззоқов.
Шунингдек, мулоқотда регламент ва қоидаларга асосан мухлислик қилиш, жамоанинг ички ишларига аралашмаслик лозимлиги таъкидланди. Эндиликда бундан буён мухлислик қоидаларини бузганлар “қора рўйхат”га олинади ва умуман стадионга киритилмайди.
Эслатиб, ўтамиз, россиялик мутахассис Андрей Канчельскис қўл остидаги “Навбаҳор” жамоаси мамлакат суперлигасининг 18-туридан кейин 23 очко жамғарган ҳолда 7-ўринда бормоқда. “Лочинлар” айни пайтда чемпионат пешқадами “Пахтакор”дан 18 очкога ортда қолишган.