“Cold Response 2022” НАТОнинг сўнгги 30 йилдаги энг йирик машғулоти Норвегия бўйлаб совуқ об-ҳаво шароитида – қуруқликда, ҳавода ва денгизда давом этмоқда.

14 март куни бошланган ҳарбий машғулотлар 1 апрелга қадар давом этади. Норвегия бошчилигидаги машғулотларда Европа ва Шимолий Американинг 27 давлатидан 30 мингтача аскар иштирок этмоқда. Баёнотда айтилишича, 220 та самолёт, шунингдек, 50 та кема, жумладан, Британия ва Италиянинг икки гуруҳ самолёт ташувчи кемалари жойлаштирилган.  

НАТО “Cold Response” узоқ вақт режалаштирилгани ва Норвегиянинг ҳар икки йилда бир марта ўтказадиган мунтазам машғулотлари эканини айтиб, бу йилги машғулотлар 8 ойдан кўпроқ вақт олдин эълон қилинганини ва Россиянинг Украинадаги ҳаракатлари билан боғлиқ эмаслигини маълум қилди.  

25 март куни НАТО бош котиби Йонс Столтенберг Норвегия шимолидаги машғулотларда иштирок этаётган қўшинлар билан учрашди. Столтенберг, “Юқори Шимол”нинг НАТО учун стратегик аҳамиятга эга минтақа эканлигини ва сўнгги йилларда минтақада Россия ҳарбий фаоллиги сезиларли даражада ошганини таъкидлади. 

– НАТОнинг ҳудудда бўлиши можаро қўзғатиш эмас, балки можаронинг олдини олиш ва тинчликни сақлашдир, – деди Йонс Столтенберг.  

НАТО бош котибининг сўзларига кўра, Норвегия Европада Хавфсизлик ва Ҳамкорлик Ташкилотининг барча 57 аъзосини машғулотларни кузатишга таклиф қилган, бироқ Россия бу таклифни рад этган.