Шимолий Атлантика альянси Украинадаги низони тезроқ якунлашга хизмат қиладиган ҳар қандай ташаббусга очиқ эканини маълум қилди.

НАТО бош котиби Марк Рютте Брюсселда ўтказилган матбуот анжуманида дипломатик мулоқотлар зиддиятни якунлашни тезлаштирса, альянс томонидан қўллаб-қувватланишини таъкидлади. Бу ҳақда “WAM” ахборот агентлиги ёзмоқда.

Рюттенинг сўзларига кўра, бу борада иттифоқчилар ўртасида тўлиқ мувофиқлаштириш ва шаффофлик муҳим аҳамиятга эга. Шунингдек, у Франция ва АҚШ томонидан олиб борилаётган дипломатик саъй-ҳаракатларни ижобий баҳолаб, Вашингтоннинг етакчилик роли муҳим омил эканини қайд этди.

Шу билан бирга, бош котиб Европа Иттифоқи ташқи сиёсат раҳбари Кая Калласнинг РФ қуролли кучлари сонини қисқартиришни бўлажак келишув шарти сифатида белгилаш ҳақидаги таклифидан масофа сақлади. Рютте бу фикрни “шахсий позиция” деб атаб, у НАТОнинг умумий қараши эмаслигини билдирди.

Мусулмон Зиё, ЎзА