Нидерландиянинг “HNLMS Rotterdam” ҳарбий кемаси минтақадаги вазиятни кузатиш учун Болтиқ денгизига кирди, дейилади “ERR” эстон телерадиоэшиттириш порталининг НАТО матбуот хизмати маълумоти билан асосланган хабарида.

“HNLMS Rotterdam” кемаси вертолёт билан боғлиқ амалиёт учун мўлжалланган.

Швециядаги миллий мудофаа коллежи илмий ходими Магнус Кристианссон бу ҳаракат Россиянинг Украина чегарасидаги ҳарбий фаоллиги ошиши натижасида юзага келган шароит билан боғлиқ, дея изоҳлаган.

“НАТО Россиянинг олдиндан англаб бўлмайдиган ҳаракатига мослашиб, Болтиқ денгизида Швеция ва Финляндия билан ҳамкорликни мустаҳкамламоқда”, дейилади Кристианссондан олинган иқтибосда.

Аввалроқ Киев ва Ғарб давлатлари Россиянинг Украина чегарасида “тажовузкорлиги” кучайганидан хавотирда эканини маълум қилган. РФ президенти матбуот котиби Дмитрий Песков эса бунга жавобан бу таҳдид эмас, шунчаки, мамлакат хавфсизлиги учун амалга оширилаётган тадбирлигини қайд этган.