«Насаф» Ўзбекистон кубоги ярим финалига йўл олди
Бугун Ўзбекистон кубогининг чорак финали доирасида «Навбаҳор» жамоаси ўз майдонида Қаршининг «Насаф» клубини қабул қилди.
Наманган шаҳридаги «Марказий» ўйингоҳда бўлиб ўтган учрашув кутилганидек, шиддатли ва муросасиз кечди. Ўйиннинг 16-дақиқасида «Насаф»нинг сербиялик легионери Марко Станоевич ҳисобни очган бўлса, 90+4 дақиқада мезбон жамоадан Шоҳруҳ Маҳмудҳожиев 20 метрлар чамаси узоқликдан дарвозага гол уриб, «Навбаҳор» ҳали курашдан чиқмаганига ишора этди — 1:1.
[gallery-411]
Бироқ ўйинга қўшиб берилган экстра таймларда шижоат барибир ўз таъсирини кўрсатди. Қўшимча вақтнинг 17-дақиқасида Ҳусайн Норчаев «Навбаҳор» жамоаси дарвозасини ишғол қилди.
Ушбу гол ўйинда сўнггиси бўлиб қолди. Натижада «Насаф» Ўзбекистон кубоги ярим финалига йўл олди.
Оқилхон Дадабоев, Ҳотам Мамадалиев (сурат), ЎзА