Маълумки, наркожиноятчилик бугун бутун инсоният учун жиддий глобал хавфга айланмоқда. Айниқса, истеъмоли осон, яшириш ва тарқатиш қулай бўлган синтетик гиёҳванд моддалар анъанавий наркотиклар ўрнини эгаллаб бормоқда. Энг ташвишлиси, уларнинг тарқалиши асосан ёшлар орасида кузатилмоқда.

Синтетик наркотиклар кўпинча яширин нарколабораторияларда тайёрланиб, интернет орқали контактсиз усулда тарқатилмоқда. Бундай жиноятлар трансчегаравий хусусият касб этиб, уюшган жиноятчилик тармоқлари орқали амалга оширилаётгани вазиятни янада оғирлаштирмоқда.

Яқинда Божхона қўмитасининг “Тошкент-АЭРО” ихтисослаштирилган божхона комплекси Контрабандага қарши курашиш шўъбаси ҳамда “Электрон тижорат” божхона пости ходимлари Давлат хавфсизлик хизмати билан ҳамкорликда ана шундай ҳолатга чек қўйди.

Янгийўл туманида истиқомат қилувчи 20 ёшли фуқаро номига Нидерландиядан халқаро курьерлик жўнатмаси келгани аниқланган. Ҳужжатларда турли конфетлар деб кўрсатилган ушбу жўнатма ташқи кўринишидан ҳам безарар туюлган. Бироқ, божхона назорати жараёнида у шубҳа уйғотган.

Экспертиза натижаларига кўра, “конфет” деб кўрсатилган маҳсулот таркибида 1 кг 351 грамм синтетик наркотик модда — клефедрон борлиги маълум бўлди.

Тергов давомида аниқланишича, жўнатма номига расмийлаштирилган шахс 10 миллион сўм пул эвазига ўз номига посилка қабул қилишга рози бўлган ва уни бошқа шахсга етказиб бериши керак эди.

Тезкор тадбирлар давомида жўнатмани қабул қилиб олиши лозим бўлган 36 ёшли фуқаро ҳам қўлга олинди. Унинг Тошкент шаҳри Яшнобод туманидаги хонадони кўздан кечирилганда, у ерда гиёҳванд моддаларни тайёрлаш ва қадоқлаш учун жиҳозланган яширин нарколаборатория фаолият юритаётгани фош этилди.

Хонадондан 5,3 килограмм синтетик наркотик моддалар, уларни тайёрлашда фойдаланилган лаборатория жиҳозлари, турли кимёвий моддалар ва ўрам материаллари далилий ашё сифатида олиб қўйилди.

Ҳолат юзасидан жиноят иши қўзғатилган.

Маълумот ўрнида айтиш жоиз, республика божхона органлари ўтган ва жорий йиллар давомида жами 7 та яширин нарколаборатория фаолиятига чек қўйган.

Шаҳноза Маматуропова, ЎзА