Жорий йилнинг 19 июль куни соат 20:30 да XXXII ёзги Олимпия ўйинларига йўл олган Ўзбекистон делегацияси Токионинг Нарита аэропортига 7 ярим соат (Япония вақти билан эрталаб соат 08:00) да етиб келди.

Улкан самолёт эшиклари очилиши билан, Токиода вазият биз кутгандан ҳам оғир эканлигини ҳис этдик. Пандемия туфайли режалар ўзгариб кетган эди. Турли текширув, назоратлар шундоқ ҳам ҳориб келаётган делегация аъзоларини мушкул аҳволга солиб қўйди. 10 соат Нарита аэропортида қолиб кетдик. Ниҳоят текширувлар тугаб, олимпия ўйинларига рухсатномани қўлга олдик. Спортчилар олимпия қишлоғига, қолган делегация аъзолари эса ўзлари учун ажратилган қароргоҳларга йўл олди.

[gallery-3161]

Олимпия ўйинларини ёритиш истагида Токиога ташриф буюрган журналистлар учун ажратилган меҳмонхона аэропортдан 70-80 километр узоқликда экан. 2 соат деганда мўлжалдаги маконга етиб келдик.

Бир-икки кун меҳмонхонада карантин нормалари бажарилгач, вазифамизни бажаришга киришамиз. Мусобақа жараёни, спортчиларимиз иштироки ҳақида кейинги лавҳаларимизда батафсил тўхталамиз.

Токио-2020 олимпиадасида 205 та давлатдан ташриф буюрган 11 минг нафарга яқин иштирокчи спортнинг 33 тури бўйича беллашади. 23 июль куни Токио-2020 ёзги олимпия ўйинларининг тантанали очилиш маросими бўлиб ўтади. Спортчиларимиз 24 июль куни қиличбозлик, дзюдо, ўқ отиш, таэквондо, оғир атлетика бўйча ўтадиган мусобақаларда ўз иштирокини бошлайди.

Муҳаммад АМИН (сурат),  ЎзА