Markaziy harbiy okrug Samarqand garnizoni harbiy qism va muassasalarida muddatli harbiy xizmatni o‘tab bo‘lgan askarlarga oliy ta’lim muassasalariga o‘qishga kirishda qo‘shimcha ball beradigan imtiyozli tavsiyanomalar tantanali topshirildi.

Yigitlik burchini ado etgan askarlarni uylariga kuzatish marosimida okrug qo‘mondonligi, faxriylar va yoshlar ishlari agentligi Samarqand viloyati boshqarmasi vakillari o‘z xizmat majburiyatini sidqidildan bajarib, yorug‘ yuz bilan uyiga qaytayotgan askarlarga minnatdorchilik bildirishdi. Shuningdek, muddatli harbiy xizmatni o‘tash jarayonida Mudofaa vazirligi va mamlakat miqyosida o‘tkazilgan sport musobaqalarida harbiy okrug sharafini munosib himoya qilgan va o‘quv-jangovar tayyorgarlik mashg‘ulotlarida faol qatnashgan askarlar e’tirof etildi.

[gallery-11225]

Marosimda muddatli harbiy xizmatchilarga oliy ta’lim muassasalariga o‘qishga kirishda qo‘shimcha ball beradigan harbiy qism qo‘mondonligining imtiyozli tavsiyanomalari topshirilib, xizmati davomida qo‘yilgan o‘quv-jangovar va maxsus topshiriqlarni bajarishda fidoyilik ko‘rsatgan, harbiy xizmatni o‘tash davrida barchaga namuna bo‘lgan askarlarning ota-onalariga tashakkurnoma hamda faxriy yorliqlar berildi.

— Bugun Vatan oldidagi yigitlik burchimni sharaf bilan o‘tab, uyga qaytyapman, - deydi Hakimboy Sobirov. – Bir yil ko‘z ochib-yumguncha o‘tib ketdi. Ammo bu davrda qasamyodimga sodiq qolgan holda komandirlarimni bergan o‘gitlariga amal qilib harbiy sohadagi bilim va ko‘nikmalarimni oshirdim. Xizmat davomida ona Vatan, sadoqat, burch, mas’uliyat degan so‘zlarning mazmun-mohiyatini anglab yetdim. Qolaversa, ota-ona, yaqinlarni qadrlashni o‘rgandim. Quvonarlisi, oliy ta’lim muassalariga o‘qishga kirish uchun imtiyoz beruvchi tavsiyanomaga ega bo‘ldim. 

Respublikamizning turli hududlaridan kelib Samarqandda yigitlik burchini o‘tagan askarlar o‘z uylariga tantanali kuzatildi.

G‘.HASANOV, A.ISROILOV (surat), O‘zA