Бағдодда намойишчилар Швеция элчихонасига бостириб кириб, бинога ўт қўйди, деб хабар берди “Reuters” агентлиги.

Воқеа 20 июлга ўтар кечаси, Стокгольмдаги Ироқ элчихонаси олдида ўтказилиши режалаштирилган намойишдан олдин юз берган.

Швециянинг “TT” агентлиги таъкидлашича, ташкилотчилар митинг ўтказишга изн сўраб, тадбирда Ироқ байроғи ва Қуръонни ёқиш режалангани тўғрисида хабар беришган. Бунга жавобан, Ироқ шиаларининг нуфузли вакили Муқтада Садр тарафдорларини Швециянинг Бағдоддаги элчихонаси ёнида намойиш ўтказишга чақирган.

“Reuters” агентлиги мазкур акцияда юзлаб одамлар иштирок этгани, атрофда кўплаб полиция ходимлари бўлишига қарамай, дипломатик ваколатхона иншоотига ўт қўйилганини ёзди.

Швеция ТИВ Ироқ ҳукумати элчихона ва ходимлар хавфсизлиги таъминланиши учун масъул эканини эслатган. Ироқ ташқи сиёсат идораси Швециянинг Бағдоддаги элчихонасига уюштирилган ҳужумни қоралаб баёнот берди. “Ироқ ҳукумати ваколатли хавфсизлик идораларига ҳодиса айбдорларини аниқлаш, уларни қонунга мувофиқ жавобгарликка тортиш учун зудлик билан тергов ўтказиш ҳамда зарур хавфсизлик чораларини кўришни буюрди”, дейилади баёнотда.

ЎзА