Намибияда құрғақшылық салдарынан 700-ден астам жабайы жануар, соның ішінде піл, зебра және бегемоттар өлтіріліп, олардың еті азық-түлік тапшылығын сезініп жатқан адамдарға таратылмақ.

CNN хабарлауынша, ел соңғы 100 жылдағы ең күшті құрғақшылықпен күресуде.

Намибияның Қоршаған орта, ауыл шаруашылығы және туризм министрлігінің мәліметінше, өлтірілетін жануарлар арасында 83 піл, 30 бегемот, 60 буйвол, 50 антилопа, 100 көк гну (Оңтүстік Африка бұғысы) және 300 зебра бар.

Министрліктің айтуынша, бұл жануарлар саны тұрақты болып саналатын ұлттық парк пен қоғамдық жерлерден алынып, кәсіби аңшылар арқылы ауланады. Мұндағы мақсат – оңтүстік-батыс Африкадағы бұл елдің тұрғындарына құрғақшылықтың салдарын жеңілдетуге көмек көрсету.

Намибияда мамыр айында құрғақшылыққа байланысты төтенше жағдай жарияланған болатын. Ел халқының жартысына жуығы – шамамен 1,4 миллион адам азық-түлік тапшылығын бастан өткеруде.

Қоршаған орта министрлігі аңшылық бағдарламасы жабайы жануарлар көп шоғырланған аймақтардағы су ресурстарына түсетін салмақты азайтуға да қызмет ететінін атап өткен. Сондай-ақ, бұл құрғақшылық кезінде адамдар мен пілдер арасындағы қақтығыстардың ықтималдығын азайтады.

Қазіргі уақытқа дейін 150-ден астам жануар ауланып, 125 мың фунт (шамамен 57 мың кг) ет алынған. «Біз елге өте қиын уақытта көмектесіп жатқанымызға қуаныштымыз», – делінген министрліктің мәлімдемесінде.