Шу кунларда слаломда эшкак эшиш бўйича Ўзбекистон миллий терма жамоаси Ал Айн шаҳрида ўтаётган халқаро ўқув-машғулот йиғинида Буюк Британия, Германия, Словакия, Словения, Хитой, Польша, Россия, Швейцария, Хорватия, Андорра, Франция ва Нидерландия каби давлат терма жамоалари билан биргаликда иштирок этмоқда.

Йиғинга жами 16 нафар спортчи жалб этилган бўлиб, улар 4 нафар мураббий ҳамда 2 нафар халқаро мутахассис: Павел Смирнов ва Ҳернанз Самуэл қўл остида шуғулланмоқда. Мамлакатимизнинг турли ҳудудларидан келган спортчилардан ташкил топган терма жамоамиз сафида Наманган вилояти спортчилари ҳам ўзларининг маҳоратларини янада ошираётир.

Шуни таъкидлаб ўтиш лозимки, спортчиларимизга халқаро ўқув-машғулот йиғини тажриба орттириш, халқаро майдонда ўз салоҳиятини янада ошириш имконини бермоқда.

Дарвоқе, слаломчиларимиз йиғиндан сўнг 2-8 март кунлари Таиландда ўтказиладиган 23 ёшгача бўлган эшкак эшувчилар ўртасидаги Осиё чемпионати ҳамда “ICF” томонида ўтказиладиган нуфузли турнирларда иштирок этади. Мусобақаларнинг, экстрим слалом йўналишида юртимиз шарафини Самандар Сайдуллаев, Даниёр Исломов ва Мустафо Матибоев ҳимоя қилади.

Қайд этиш жоизки, миллий терма жамоа таркибидан жой олган етакчи спортчиларнинг спорт анжомлари янгиланди. Энди улар нуфузли мусобақаларда янги қайиқларда иштирок этиб, юқори натижалар учун кураш олиб боради.

Жавоҳир Тошхўжаев,

Ҳотам Мамадалиев (сурат), ЎзА