14 май куни эрталаб Наманган темирйўл вокзалидан Сардоба сув омбори тўғони ўпирилишидан талафот кўрган ҳудудлардаги бунёдкорлик ишларига ҳисса қўшишни аҳд қилган наманганлик қурувчилар жой олган махсус поезд Сирдарё вилояти томон йўлга чиқди.

Вилоятдан 50 дан ортиқ пудратчи ташкилотнинг бетончи, пайвандчи, ғишт терувчи, бўёқчи, дурадгор ва бошқа қурилиш усталари каби 800 нафардан зиёд ишчи ҳамда мутахассислари Сирдарёга сафарбар қилинди. Улар Мирзаобод туманининг Навбаҳор маҳалласида наманганликлар номидан барпо этиладиган 135 та уй қурилишида иштирок этади.

Сирдарёда қурувчиларимизни вилоят ҳокимлигининг махсус штаби вакиллари кутиб олади. Мазкур штаб томонидан мутахассисларимизни жойлаштириш, маиший шароитлар яратиш ва иш ҳажмларини белгилаш билан боғлиқ масалалар тезкорлик билан ҳал этиш чоралари кўрилади, деб хабар беради вилоят ҳокимлигининг ахборот хизмати.