Наманган вилоятининг Чуст туманида узоқ муддатга мўлжалланган чиқинди полигонининг йўқлиги, мавжудларининг эса жойдан-жойга кўчирилиши оқибатида юзага келаётган жиддий муаммоларнинг олдини олиш мақсадида йирик ишлаб чиқариш лойиҳаси бошланди.

Тумандаги Зарафшон маҳалласи ҳудудидан экосаноат зонасини ташкил этиш учун танлаб олинган 15 гектар ер майдонининг 10 гектарида масъулияти чекланган жамият шаклидаги “Everbright Environmental Energy Namangan” хоирижий корхонаси томонидан Хитой Халқ Республикаси инвестицияси билан ҳамкорликда 150 миллион долларни ташкил этувчи чиқиндини ёқиш орқали электр энергия ишлаб чиқариш лойиҳаси амалга оширилади. 

Завод қурилишига тамал тоши қўйиш тадбирида хорижлик ҳамкорлар, нуронийлар, вилоят ва туман жамоатчилиги вакиллари иштирок этди. Вилоят экология ва иқлим ўзгариши бош бошқармаси бошлиғи Шуҳрат Мақсумовнинг қайд этишича, ушбу лойиҳа ишга тушиши ҳисобига 547,5 минг тонна чиқинди қайта ишланади, 310 миллион кВт соат электр энергияси ишлаб чиқарилади, шундан 254 миллион кВт соати тармоққа узатилади. Бу, тахминан 300 минг аҳолининг йиллик электр энергияга бўлган эҳтиёжини қоплайди. Асосийси шундаки, янги лойиҳа натижасида 180 киши доимий иш билан таъминланади. 

Наманган вилоятида бир кунда ўртача 1 минг 450 тонна, йиллик 529,3 минг тонна чиқинди тўпланиб, тўлиқ қайта ишлаш имконияти яратилмоқда. Лойиҳанинг илк босқичида олтита тумандан йиғилган чиқиндилар Тўрақўрғондаги қайта юклаш станциясига келтирилиб, сараланади ва янги заводга олиб келинади. 

Тақдимотда қатнашган Наманган вилояти ҳокими, сенатор Шавкат Абдураззоқов бу йирик лойиҳа келгусида экология ва атроф-муҳитни яхшилаш, вилоят иқтисодиётини тараққий эттиришга муносиб ҳисса қўшишини таъкидлади. 

Оқилхон Дадабоев, ЎзА.