44 ёшни қаршилаган А.Т. меҳнатсиз енгил пул топиш йўлини танлаб адашди. Оилани ҳалол пул билан боқишни ўйламади.

Бунинг оқибатида навбатдаги “ўлжа”ни қўлга киритган пайтида ички ишлар ходимлари томонидан қўлга олинди.

Уч нафар фарзанднинг отаси А.Т. Наманган шаҳридаги Яккасада маҳалласида истиқомат қилади. Бу ҳудуддан халқ депутатлари вилоят Кенгашига сайланган депутат, “Миллий тикланиш” демократик партияси фаоли Аҳмаджон Аълохўжаев шу оиланинг яшаш шароити билан яхши таниш бўлгани, “Темир дафтар” рўйхатида туришини эътиборга олган ҳолда, Наманган шаҳар судига депутатлик сўровини юборди.

Ўтказилган судда халқ ноибининг ўз сайловчилари манфаатини кўзлаб қилган илтимосномаси ҳам ҳисобга олинди. Бунинг натижаси ўлароқ, 44 ёшли судланувчи суд залидан озод этилди. Депутат оила бағрига қайтган А.Т. билан яқиндан суҳбатлашиб, тушунтириш ишларини олиб борди. Жиноят кўчасига кирган бу фуқарога қилган қилмишидан жиддий хулоса чиқариши лозимлиги, бундан буён энди фарзандлари олдида боши эгилмаслиги учун ҳалол меҳнат қилиши зарурлиги уқтирилди. Депутат томонидан мазкур оилага тегишли ёрдам кўрсатиладиган бўлди.

Энди бир оила бошлиғи соғлом муҳитга қайтиб, фарзандлари келажаги учун ёруғ юз билан ризқ топишга киришадиган бўлди.

Оқилхон Дадабоев, ЎзА