Namangan shahrining Davlatobod tumanida yuz bergan favqulodda hodisa oqibatida yangi avtomashina yonib ketdi.

Viloyat Favqulodda vaziyatlar boshqarmasi axborot xizmati rahbari Qahramon Sattorovning O‘zA muxbiriga xabar berishicha, ushbu hodisa bugun, 2021 yil 13 noyabr kuni soat 04:00larda Namangan shahrining Davlatobod tumanidagi Yuksalish mahallasi, “Yoshlar” ko‘chasidagi uy oldidagi avtoturargohda yuz bergan. Ushbu joydagi “Malibu” avtomashinasida yong‘in sodir bo‘lgan. Mazkur falokat Namangan shahar FVB yong‘in qutqaruvchilari tomonidan bartaraf etilgan. Ma’lum bo‘lishicha, yong‘in oqibatida mashinaning salon qismi to‘liq, motor va ustki qismi esa qisman yonib zararlangan.

Ayni vaqtda, avtoturargohda sodir bo‘lgan yong‘in yuzasidan tegishli huquqni muhofaza qilish idorasi tomonidan tergovga qadar surishtiruv ishlari olib borilmoqda.

O‘zA