Наманган вилоятидаги олий ўқув юртларида таълим сифати ва самарадорлигини ошириш борасида халқаро ҳамкорлик алоқаларига алоҳида эътибор қаратилмоқда. Хусусан, Наманган муҳандислик-технология институти ҳамда Беларусь миллий техника университети ўртасида тузилган икки томонлама келишув натижасида Беларусдаги нуфузли олий таълим муассасаси делегацияси Наманганга ташриф буюрди.

Даставвал, Наманган муҳандислик-технология институти реткори, профессор Одилжон Маматкаримов ҳамда Беларусь миллий техника университети ректори, профессор Сергей Харитончик ўртасида мулоқот бўлиб ўтди. Унда иккала илмгоҳнинг проректорлари ва деканлари, профессор-ўқитувчилари иштирок этди.

Учрашувда қайд этилганидек, шу йилнинг сентябрь ойида Наманган муҳандислик-технология институти олимларининг Беларусга хизмат сафаридан кейин мазкур университет билан ҳамкорликда режалаштирилган лойиҳалар кўлами тобора кенгайиб бормоқда. Хусусан, институт ва университет ҳамкорлигида Наманганда ташкил этилган “2+2” дастури асосидаги қўшма таълим маркази икки томонлама алоқалар ўз самарасини бераётганидан далолат беради.

Мулоқотда, Беларусь миллий техника университети ректори томонидан ушбу қўшма таълим маркази лойиҳасининг сифатини янада кўтариш учун университетнинг илмий салоҳиятидан самарали фойдаланиш таклифи илгари сурилди. Шунингдек, меҳмонлар Беларусь миллий техника университетининг ёзги ўқув оромгоҳига наманганлик талаба ёшларни иштирок этишга чорлади.

– Ўзбекистонлик ҳамкасбларимиз билан учрашув ва музокараларимиз натижаларга бой бўлди. Биз кўп масалалар юзасидан Наманган муҳандислик-технология институти раҳбарияти билан келишиб олдик, – дейди Беларусь миллий техника университети ректори Сергей Харитончик. – Жумладан, бизнинг олийгоҳ ва НамМТИ ҳамкорлигида “1+1” дастури бўйича магистратура бўлими ташкил этилади, профессорларимиз алмашинуви йўлга қўйилади ҳамда икки томонлама халқаро илмий-амалий анжуманлар ўтказилади.

Меҳмонлар Наманган муҳандислик-технология институтининг лаборатория биносида бўлиб, бу ерда яратилган шароитлар, айниқса, замонавий ўқув лаборатория жиҳозларига юқори баҳо берди. Дарвоқе, ушбу жиҳозлар Жахон банки томонидан қарийб 11 миллиард 500 миллион сўмлик молиявий кўмак асосида ўрнатилган. Улар орқали 400 га яқин ўқув лаборатория амалиётларини бажариш имконияти мавжуд.  Делегация аъзолари институтнинг 8-ўқув биносида жойлашган “Беларусь – Ўзбекистон” қўшма таълим марказида бўлиб, талаба-ёшлар билан мулоқот қилишди. “2+2” дастури асосида ўқиётган талаба-ёшлар белоруслик меҳмонларга қизиқтирган саволларини йўллаб, батафсил жавоб олди. Меҳмонлар ҳамкорлик алоқалари давомийлигини таъминлаш мақсадида Наманган муҳандислик-технология институти жамоасини яна бир карра, Минск шаҳрига хизмат сафарига таклиф этди.

Оқилхон Дадабоев,

Маъмуржон Эргашев (сурат), ЎзА