ФОТОРЕПОРТАЖ

Наманган вилояти ҳокими Шавкат Абдураззоқов Туркиянинг Liv Hospital халқаро тиббиёт муассасалари тармоғи раҳбари Мэри Истироти хоним билан музокаралар ўтказди. Видеоконференцалоқа шаклида ўтказилган музокараларда вилоят соғлиқни сақлаш соҳаси етакчилари ва Liv Hospital раҳбарлари иштирок этди.

Дастлаб, вилоят ҳокими ҳамкорларга Наманганда тиббиётни ривожлантириш истиқболлари ва имкониятлари ҳақида батафсил маълумот берди. Хусусан, жуғрофий қулайлик, демографик ўсиш, иқтисодий тараққиёт ва табиий шароитларнинг ўзига хослиги алоҳида кўрсатиб берилди.

Ўз навбатида Мэри Истироти хоним ҳам Liv Hospital халқаро тиббиёт муассасалари тармоғи модели, бошқарувдаги инновациялар билан таништирди.

[gallery-10581]

Шундан сўнг, тиббиёт ходимларининг малака ошириши, мутахассислар тайёрлаш, тиббиёт муассасаларини замонавий бошқарувга ўтказиш борасида фикр алмашилди.

- Бир ҳафта ичида вилоятдаги тиббиёт марказлари директорлари ва шифокорларидан иборат делегацияни Туркияга юборамиз. Улар онкология, нейрохирургия, лор, травматология ва ортопедия каби йўналишларда тажриба алмашадилар, - деди вилоят ҳокими.

Туркиялик ҳамкорлар билан икки томонлама муносабатларни ривожлантириш орқали тиббиёт туризмини ҳам йўлга қўйиш, юқори технология талаб этиладиган жарроҳлик амалиётларини Наманганда ўтказиш бўйича ҳам босқичма-босқич иш олиб боришга келишиб олинди.

Маълумот ўрнида шуни айтиш жоизки, Liv Hospital халқаро тиббиёт муассасалари тармоғи Туркияда еттита, Озарбайжонда битта тиббиёт замонавий клиникалари, шунингдек, тиббиёт коллежи ҳамда академияси билан машҳур бўлиб, инвестор сифатида эмас, балки бошқарувни замонавийлаштириш орқали тиббий хизмат сифатини ошириш тамойилини қўллайди. Биргина Бакуда ушбу тамойил асосида иш олиб бориши натижасида Истанбулга келадиган беморлар оқими сезиларли даражада камайиб Озарбайжонда даволанишни бошлаган.

Ҳотам МАМАДАЛИЕВ(сурат),ЎзА