Тадбиркорликка яратилган қулай шароит, ишбилармонларга берилган савдо-сотиқ эркинлиги кутилмаган, аммо қувончли натижалар келтирмоқда.

Ҳа, Наманган тадбиркорлар маркази.

Ҳа, Наманган экспорт қилиш ҳажми бўйича мамлакатда пешқадамлардан бири.

Аммо Наманган  экспорти дейилганда асосан енгил саноат маҳсулотлари тушунилар эди. Наманганда тикилган костюмларни Европа, Осиёнинг деярли барча мамлакатларида учратасиз. Бу – фахрли, албатта. Лекин, Наманганда ишлаб чиқарилган миллий қандолат маҳсулотлари экспорт қилинаётганини эшитганмисиз? 

“Panda” бренди остидаги ширинликлар кириб бормаган хонадон йўқ ҳисоб. 60 турдан зиёд вафли, печеньелар, шоколаду машҳур “Рафаэлло” нинг ўзбекча “Роҳатижон”и, турфа хил конфетлар... Буларнинг ҳаммаси наманганлик Одиловлар оилавий қандолатчилик корхонаси маҳсулотларидир. Россия, ҳамдўстлик мамлакатларида истеъмолчилар “Panda” брендини сўраб сотиб олмоқдалар.

–Ҳозирги кунда жамиятимизда 200 га яқин ишчи ходимлар фаолият олиб бормоқда, –дейди “Panda” саноат-савдо МЧЖ раҳбар ўринбосари Алишер Жумабоев. –2023 йилда корхонамизда жами 50 миллиард сўмлик қандолат маҳсулотлари ишлаб чиқарилди. Асосий мақсадимиз сифатли, арзон, ҳамёнбоп ширинликларни халқимиз дастурхонига етказиб бериш.

Эътибор қилинг, биргина оилавий қандолатчилик корхонаси ўтган йилнинг ўзида 50 миллиард сўмлик маҳсулот ишлаб чиқариб сотган! Ички бозорку тўлиқ эгалланган. Энди “ташвиш”лари битта:

–Жамиятимиз олдида турган энг асосий вазифаларидан бири экспорт масаласи бўлиб, маҳсулотимизни Осиё бозорларига чиқаришни кўзда тутяпмиз. Ҳозирги кунда у ердаги ҳамкорлар билан шартнома муносабатларини йўлга қўймоқдамиз, – дейди Алишер Жумабоев.

Шу кунларда корхона раҳбари Муҳаммаджон Одилов бошқа наманганлик тадбиркорлар билан бирга Хитойда. Мақсади янада самарадор янги технологиялар олиб келиш ва маҳсулотига чинмо-чиннинг улкан бозоридан жой топиш. Қойил қолмай бўладими буларга.

Аслида эса Наманган шаҳрининг ўзида Одиловларга ўхшаган қандолатчилар оз эмас экан.

–Наманган шаҳрида бугунги кунда 100 га яқин қандолат маҳсулотларини ишлаб чиқариш корхоналари мавжуд. Улар томонидан бир йилда 330 миллиард сўмлик 150 хилдан ортиқ қандолат маҳсулотлари ишлаб чиқарилмоқда, – дейди Наманган шаҳар ҳокимлиги бош мутахассиси Улуғбек Отахонов.

Яқин кунларда “Panda” савдо-саноат масъулияти чекланган жамияти қандолатчилик маҳсулотларини ширинликсевар Осиё мамлакатларида учратсак ҳам ажаб эмас.

<iframe width="650" height="420" src="https://www.youtube.com/embed/_WERXVzCwns" title="NAMANGAN: QANDOLATCHILIK MAHSULOTLARI EKSPORT QILINMOQDA" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Муаллиф: Муҳаммаджон Обидов

Тасвирчи: Элёр Олимов