Франциянинг Natixis инфестбанки таҳлилчилари хулосасига кўра, нафақахўрларнинг яхши ҳаёт кечиришга бўлган ишончи хавф остида қолмоқда. Экспертларнинг фикрича, вазият пандемиягача ҳам беқарор эди, ёз бошланганда эса янада мураккаблашди. Мутахассислар нафақага чиққанлар ёки энди чиқишга тайёрланаётган кексалар учун асосий қийинчиликларни санаб ўтишди, шунингдек нафақа ҳисобига ҳаёт кечириш учун энг яхши мамлакатлар номини ҳам айтиб ўтишди, деб ёзади Bloomberg агентлиги.

Ҳисоботда ёзилишича, COVID-19 тарқалишининг иккинчи тўлқини жорий йилнинг тўртинчи чорагида ишсизлик янада ортишига сабаб бўлади. Бу эса пенсия жамғармасига тушимнинг қисқаришига олиб келади. Даромадини йўқотган айрим одамлар аллақачон ўзларининг нафақа жамғармаларини ҳам сарфлашни бошлаб юборган. Яна бир хавф, бу банк ставкаларининг пастлигидир, чунки бундай ҳолатда нафақахўрлар ўзларининг кексалик учун жамғарган пулларини тез сарфлаб юборади. Яна бир муаммо, бўлажак пенсионерларга давлат қарзларининг юқори даражаси, даромад топишдаги тенгсизлик ва иқлимнинг ўзгариши ҳам сезиларли таъсир кўрсатади.

Natixis экспертлари 44 та мамлакатда нафақахўрларнинг фаровонлиги ва молиявий хавфсизлигини ўрганиб чиқишди. Бунда улар моддий фаровонлиги, ҳаёт кечириш сифати ва соғлигини ҳисобга олишди. Кексалар учун яхши ҳаёт кечириш бўйича мамлакатлар рейтингида энг юқори ўринларни Исландия, Швейцария ва Норвегия эгаллади. Бу борада АҚШга 18, Россияга эса 44 ўрин муносиб кўрилган.