Мамлакатни бошқаришдан четлаштирилган Мьянманинг собиқ давлат маслаҳатчиси Аун Сан Су Чжи 164 йилга қамалиши мумкин.

The Irrawaddy газетасининг хабар беришича, ҳарбийлар унга коррупция бўйича яна бешта айблов эълон қилган. 14 январда маълум қилинган янги айбловлар Аун Сан Су Чжи ҳукуматининг табиий офатларга қарши кураш ва бошқа эҳтиёжлар учун вертолёт ижараси ва хариди билан боғлиқ, дейилади газета хабарида. Коррупция бўйича ҳар бир айблов 15 йиллик қамоқ жазосини назарда тутади. Худди шундай бешта айблов мамлакат президенти Вин Мьинга нисбатан ҳам қўлланилмоқда.

Нашрининг эслатишича, ўтган сентябрда ҳарбийлар Аун Сан Су Чжининг бешта адвокатига ҳам оммавий ахборот воситалари билан алоқа қилишни тақиқлаб қўйган эди, Шу боис давлат маслаҳатчисининг суд иши қандай кечаётгани ва у қаерда сақланаётгани ҳақда маълумот йўқ.

2021 йил 1 февралда Мьянма ҳарбийлари ҳокимиятни эгаллаб олганди. Шундан кейин улар бир йиллик муддат билан мамлакатда фавқулодда ҳолат тартибини жорий қилди. Шундан буён ҳарбийлар томонидан фуқаролик ҳукуматнинг ағдарилишига қарши мамлакатда норозилик намойишлари тўхтамаяпти.