– Ўзбек халқи азалдан ўз фикрига эга бўлган. Мутолаа қилган инсон фикрлай олади. Демак, халқимиз азал-азалдан мутолаани этагидан тутган, илмга ташна бўлган.

Онамнинг ўқиб берган китобларини эшитиб эсимизни таниб, мутолаага меҳр қўйганмиз. Ўша дамлар китоб бизнинг ҳаётимизга ўзгача файз бағишларди. Аста-секин ҳарф танидик. Ўзимиз китоб ўқишга киришдик. Ўша вақтлар бизда бир фалсафа бор эди: китобдан йироқлашсак, ўзимизни замондан қолиб кетаётгандек ҳис қилардик. Шунинг учун кўп-кўп китоб ўқирдик.

Китоб ўқисанг кам бўлмайсан, дерди онам. Ҳақиқатдан мутолаа туфайли қатордан кам бўлмадик. Нимагаки эришган бўлсак илмимиз туфайлидир. Ниманики ютқазган бўлсак илмсизлигимиз сабаб бўлди, деб биламан.