Ўзбекистон Республикаси Қуролли Кучлар Академиясида “Намунали ҳарбийлар оиласи” кўрик-танловнинг якуний босқичи ўтказилди.

Мудофаа вазирлиги томонидан юртимиз осойишталиги йўлида хизмат қилаётган ҳарбий хизматчиларнинг оилалари ўртасида соғлом турмуш тарзини тарғиб қилиш, оила маданияти ва одобини шакллантириш, ушбу оилаларда камол топаётган фарзандлар тарбиясини тўғри йўлга қўйиш, оилаларнинг ибратли жиҳатларини юзага чиқариш, ахлоқий фазилатларга эга бўлган энг намунали ҳарбий оилаларни аниқлаш мақсадида ҳар йили ушбу кўрик-танлов ўтказиб келинади.

Онлайн тарзда ўтказилган танлов якуний босқичида ҳарбий округ ва унга тенг бўлган бирлашмалар ҳамда олий ҳарбий таълим муассасалари миқёсида ғолибликни қўлга киритган 7 жамоа “Оилам-менинг бахтим” мавзусидаги шеърий таништирув, “Мустаҳкам оила - жамият таянчи” мавзусидаги видеоролик намойиши ва "Оилам қизиқишлари" номли шартлар асосида ўзаро беллашди.

Ғолибликни қўлга киритган ва ўз чиқишларида миллий анъана ва урф-одатларимиз, шунингдек, оилада соғлом турмуш тарзини тарғиб қилаётган ҳарбий оилаларга Ўзбекистон Республикаси Мудофаа вазирлигининг фахрий ёрлиқ ва эсдалик совғалари топширилди.  

Танловда Қуролли Кучлар Академияси сержантлари фарзандлари томонидан концерт дастури намойиш этилди.

М. Қудратуллаева, ЎзА