Миллий гвардия Сурхондарё вилояти бошқармасининг Термиз туманидаги Қорабайир отлари маҳорат мактабида ёшлар ўртасида спортнинг камондан отиш, от устида кураш, жамоавий улоқ кўпкари, беш кураш, арқон тортиш ҳамда стол тенниси каби турлари бўйича вилоят биринчилиги бўлиб ўтди.

Қуролли Кучларимиз ташкил этилганининг 30 йиллиги ҳамда 14 январь – Ватан ҳимоячилари куни муносабати билан эълон қилинган "Ҳарбий-ватанпарлик ойлиги" доирасида ташкил этилган мусобақа ёшларнинг қишки таътил кунларини мароқли ўтказиш, уларнинг миллий спорт ўйинларига қизиқишини ошириб, жалб этиш, ватанпарварлик туйғуларини янада мустаҳкамлашга йўналтирилгани билан барчада катта қизиқиш ўйғотди.

 
Қизғин баҳсларга бой бўлган мусобақада  ҳарбийлар томонидан турли кўргазмали чиқишлар намойиш этилди. 
Беш юздан ортиқ ёшлар иштирок этган мусобақада етук ирода, чапдастлик, чавандозлик ва мерганлик маҳоратини  кенг намойиш этган спортчилар   кубок, медал ва эсдалик совғалар билан тақдирланди. 

Холмўмин МАМАТРАЙИМОВ, ЎзА